சிலாபத்தில் குடும்பஸ்தர் சுட்டுக் கொலை

by **நண்பன்** Thu 25 Aug 2011 - 4:20

சிலாபத்தில் குடும்பஸ்தர்
சுட்டுக் கொலை

முன்னேஸ்வரம் குறூப் நிருபர்

சிலாபம், முக்னுவட்டவன, சிப்பிகலான என்ற இடத்தில் வசித்துவந்த மூன்று குழந்தைகளின்
தந்தையொருவர் நேற்று முன்தினமிரவு சுட்டுக் கொல்லப்பட்டுள்ளார்.
இச் சம்பவம் தொடர்பாக சிலாபம் பொலிஸார் குறிப்பிட்டதாவது, சிப்பிகலானவில் வசித்து
வருகின்ற துடுவகே லெனாட் பெரேரா லிண்டன் (வயது 40) நேற்று முன்தினமிரவு உணவு
உட்கொண்டதன் பின்னர் தமது வீட்டின் விறாந்தையில் இருந்துள்ளார். இச் சமயம் மிக
கிட்டிய தூரத்திலிருந்து இனம் தெரியாத நபரொருவர் இவர் மீது துப்பாக்கி பிரயோகம்
செய்து விட்டு தலைமறைவாகியுள்ளார்.
இத்துப்பாக்கி பிரயோகத்தினால் இவரது மார்பிலும், தலையிலும் சன்னங்கள் பாய்ந்துள்ளன.
இதனால் படுகாயமடைந்த அந்நபர் உடனடியாக சிலாபம் தள ஆஸ்பத்திரியில் சிகிச்சைக்காக
அனுமதிக்கப்பட்டார். இருப்பினும் சிகிச்சை பலனளிக்காததால் அந்நபர் உயிரிழந்தார்.
இச் சம்பவத்துடன் தொடர்புடையவர் என்ற சந்தேகத்தின் பேரில் நேற்று நண்பகல் வரையும்
எவரும் கைது செய்யப்படவில்லை. இது ஒப்பந்தக் கொலையாக இருக்கலாமென பொலிஸார் சந்தேகம்
தெரிவித்துள்ளனர்.
இச் சம்பவத்தில் உயிரிழந்துள்ள நபர் அப்பகுதியில் திருட்டு மணல் வியாபாரத்தில்
ஈடுபட்டு வருபவராவார். இவருக்கும், மற்றொரு குழுவுக்குமிடையில் நீண்ட நாட்கள்
வியாபாரப் போட்டி நிலவி வருவதாகவும் இப்போட்டி காரணமாக ஏற்கனவே போட்டிக்குழு
நபரொருவர் மீது துப்பாக்கி பிரயோகம் செய்துள்ளார். இது தொடர்பான வழக்கு விசாரணையும்
இடம் பெற்று வருகின்றது என்பது பொலிஸாரின் ஆரம்ப விசாரணைகளில் தெரிய வந்துள்ளது.
சிலாபம் பொலிஸ் நிலையப் பொறுப்பதிகாரி பிரதம இன்ஸ்பெக்டர் துஷிதகுமார தலைமையில் இச்
சம்பவம் தொடர்பான புலன் விசாரணைகள் இடம்பெறுகின்றன.