ஜப்பான் பிரதமர் நவோட்டோகான் 30 ஆம் திகதிக்குள் பதவி விலகல்

ஜப்பான் பிரதமர் நவோட்டோகான்
30 ஆம் திகதிக்குள் பதவி விலகல்



ஜப்பான் பிரதமர் நவோட்டோ கான் இம் மாதம் 30 ஆம் திகதிக்குள் பதவி விலகுவதாக
அறிவித்துள்ளார். இதனைத் தொடர்ந்து அவரையடுத்து யார் அந்தப் பதவிக்கு வருவது என
அவரது கட்சியில் கடும் போட்டி நிலவுகிறது.
ஜப்பானின் ஜனநாயகக் கட்சி சார்பில் நவோட்டோ கான் பிரதமராகப் பதவியேற்றார்.
ஆனால், இந்தாண்டு மார்ச் 11 ஆம் திகதி நிகழ்ந்த நில நடுக்கம் மற்றும் சுனாமி,
புக்குஷிமா அணுக் கதிர்வீச்சு கசிவு போன்ற இயற்கைப் பேரிடர்களின் போது, அவரது அரசு
சரியாகச் செயல்படவில்லை என மக்களிடையே நடந்த கருத்துக் கணிப்பில் தெரிய வந்தது.
இதையடுத்து, கான் பதவி விலகக் கோரி கட்சியில் நெருக்கடி அதிகரித்தது.
கடந்த ஜுலை மாதம் இது குறித்து அறிக்கை விடுத்தகான், விரைவில் தான் பதவி விலகப்
போவதாகத் தெரிவித்தார். அதன்படி நேற்று முன்தினம் ஜப்பான் பாராளுமன்றத்தில் பேசிய
அவர், இன்னும் இரு முக்கியமான சட்ட மூலங்கள் நிறைவேறும் வரை தான் பதவியில்
நீடிப்பதாகவும், இம் மாதம் 30 ஆம் திகதிக்குள் தனது பதவியை ராஜினாமா செய்து
விடுவதாகவும் உறுதியாகத் தெரிவித்தார்.
அவரையடுத்து, பிரதமராவதற்கு ஜனநாயகக் கட்சியில் ஐந்து முக்கிய பிரமுகர்கள் போட்டி
போடுகின்றனர். இவர்களில் ஒருவர் அடுத்த வாரம் கட்சியால் பிரதமராகத் தெரிவு
செய்யப்படுவார் எனத் தெரிகிறது.