தமிழக கவர்னராக ரோசையா நியமனம்: இன்று அதிகாரப்பூர்வ அறிவிப்பு

ஐதராபாத், ஆக.26-


தமிழக
கவர்னராக சுர்ஜித்சிங் பர்னாலா இருந்து வருகிறார். இவருக்கு ஏற்கனவே ஒரு
முறை பதவி நீடிப்பு கொடுக்கப்பட்டது. அது கடந்த ஜூலை மாதத்துடன்
முடிவடைந்தது. அவருக்குப்பதில் புதிய கவர்னர் நியமிக்கப்படாததால் பர்னாலா
தமிழக கவர்னராக நீடித்து வருகிறார். தமிழகத்துக்கு புதிய கவர்னராக யாரை
நியமிக்கலாம் என்று மத்திய அரசு தீவிரமாக ஆலோசித்து வந்தது.

ஆந்திர
முன்னாள் முதல்-மந்திரி ரோசையா பெயர் தமிழக கவர்னர் பதவிக்கு சிபாரிசு
செய்யப்பட்டது. இதற்கு மத்திய அரசு ஒப்புதல் தெரிவித்து விட்டதாக தகவல்
வெளியாகி உள்ளது. இதுபற்றி இன்று மத்திய அரசு அதிகாரப்பூர்வமாக அறிவிப்பு
வெளியிடுகிறது.

தமிழக கவர்னராக நியமிக்கப்பட உள்ள
ரோசையாவுக்கு வயது 79. இவர் 50 ஆண்டுகளுக்கு மேல் ஆந்திர காங்கிரசில் மூத்த
தலைவராக இருந்து வருகிறார். 1979 முதல் 2009-ம் ஆண்டுவரை ஆந்திராவில்
முதல்-மந்திரிகளாக இருந்த சென்னாரெட்டி, அஞ்சையா, விஜயபாஸ்கரரெட்டி,
ஜனார்த்தன்ரெட்டி, ராஜசேகர ரெட்டி ஆகியோர் மந்திரி சபையில் ரோசையா இடம்
பெற்று முக்கிய பொறுப்புகள் வகித்துள்ளார்.

நிதி
மந்திரியாக இருந்து 16 முறை பட்ஜெட் தாக்கல் செய்து சாதனை படைத்துள்ளார்.
1998-ல் எம்.பி.யாக தேர்ந்தெடுக்கப்பட்டார். 1995-ல் ஆந்திர மாநில
காங்கிரஸ் தலைவராக இருந்தார். ஒய்.எஸ்.ராஜசேகர ரெட்டி மந்திரிசபையில்
மூத்த மந்திரியாக இருந்த ரோசையா, ராஜசேகர ரெட்டி மறைவுக்கு பிறகு
முதல்-மந்திரி ஆனார்.

கட்சிக்குள் ஏற்பட்ட
நெருக்கடி காரணமாக முதல்-மந்திரி பதவியை இழந்தார். தற்போது எம்.எல்.ஏ.வாக
இருக்கிறார். கவர்னராக நியமிக்கப்பட்டதும் அவர் எம்.எல்.ஏ. பதவியை ராஜினாமா
செய்து சென்னை வந்து கவர்னராக பதவி ஏற்பார்.

தமிழகம் தவிர ஆந்திரா, கேரளா, ராஜஸ்தான், பஞ்சாப், மத்தியபிரதேசம் ஆகிய 5 மாநிலங்களுக்கும் புதிய கவர்னர்கள் நியமிக்கப்படுகிறார்கள்.