பதிவு செய்யப்படாத தனியார் மருந்தகங்கள் மீது நடவடிக்கை

பதிவு செய்யப்படாத தனியார் மருந்தகங்கள் மீது நடவடிக்கை
மர்லின் மரிக்கார்
பதிவு செய்யப்படாத தனியார் மருந்தகங்களை இனங்கண்டு அவற்றுக்கு எதிராக சட்ட நடவடிக்கை எடுப்பதற்காகத் திடீர் தேடுதல்களை உடனடியாக ஆரம்பிக்குமாறு சுகாதார அமைச்சர் மைத்திரிபால சிறிசேன அதிகாரிகளுக்குப் பணிப்புரை விடுத்துள்ளார்.

தனியார் மருந்தகங்கள் தொடர்பாகப் பொது மக்கள் தெரிவித்துள்ள புகார்களின் அடிப்படையிலேயே அமைச்சர் சிறிசேன இந்த அறிவுறுத்தலை அழகுசாதன உபகரணங்கள் மற்றும் மருந்துப் பொருட்கள் தொடர்பான தேசிய அதிகார சபைக்கு வழங்கியுள்ளார்.

சில தனியார் மருந்தகங்களில் தகுதியான மருந்தாளர்கள் கடமையாற்றாமை, தரக்குறைவான மருந்துப் பொருட்கள் சந்தைப்படுத்தப்படுகின்றமை, மருத்துவர்கள் சிபாரிசு செய்கின்ற மருந்துப் பொருட்களுக்கு மாற்றமான மருந்து பொருட்களை வழங்குகின்றமை உட்பட பல விடயங்கள் குறித்து பொது மக்கள் அமைச்சரின் கவனத்திற்குக் கொண்டு வந்துள்ளனர்.

இதனடிப்படையில் அமைச்சர் வழங்கிய அறிவுறுத்தலுக்கு அமைய மருந்து பொருள் அதிகார சபை அதிகாரிகள் நேற்று முன்தினம் கொழும்பில் இத் திடீர் தேடுதலை மேற்கொண்டனர்.

இச் சமயம் பத்து மருந்தகங்கள் சோதனைக்கு உட்படுத்தப்பட்டன. அவற்றில் நான்கு மருந்தகங்களின் பதிவு புதுப்பிக்கப் படாதிருந்ததும் கண்டுபிடிக்கப்பட்டது. இம்மருந்தகங்களுக்கு எதிராக சட்ட நடவடிக்கை எடுக்கப்படும் என அமைச்சின் அதிகாரியொருவர் கூறினார்.

@. :”@: