காணாமல் போன 11 நாட்களுக்கு பிறகு தலை துண்டான நிலையில் மாணவி சடலம் மீட்பு

நெய்வேலி : காணாமல் போன பள்ளி மாணவி 11 நாட்களுக்கு பிறகு தலை துண்டான நிலையில் கிணற்றில் பிணமாக மீட்கப்பட்டார். கடலூர் மாவட்டம் நெய்வேலி அடுத்த வானாதிராயபுரம் கிராமத்தை சேர்ந்தவர் ரவிச்சந்திரன். இவர் வடலூரில் பர்னிச்சர் கடை நடத்தி வருகிறார். இவரது மகள் கனிகா(10). வடலூரில் உள்ள ஒரு தனியார் மெட்ரிக் பள்ளியில் 5ம் வகுப்பு படித்து வந்தார்.

வழக்கமாக இவர் காலையில் தனது தந்தையுடன் பள்ளிக்கு செல்வார். மூத்த சகோதரரும், இளைய சகோதரியும் சைக்கிளில் சென்று விடுவர். மாலை வீடு திரும்பும் போது கனிகா மட்டும் அவ்வழியே செல்லும் நபர்களிடம் லிப்ட் கேட்டு செல்வது வழக்கம். கடந்த 17ம்தேதி மாலை பள்ளி முடிந்ததும் வழக்கம் போல கனிகா வீடு திரும்பும்போது ஒரு வாலிபரின் சைக்கிளில் சென்றுள்ளார்.

இதனை அவரது சித்தப்பாவும், ஒரு சில பெண்களும் பார்த்துள்ளனர். ஆனால் கனிகா வீடு திரும்பவில்லை. அதிர்ச்சியடைந்த பெற்றோர், பல இடங்களில் தேடியும் கிடைக்கவில்லை. இதுகுறித்து டவுன்ஷிப் போலீசில் ரவிச்சந்திரன் புகார் கொடுத்தார். நெய்வேலி டிஎஸ்பி மணி உத்தரவின் பேரில் தனிப்படை அமைக்கப்பட்டு மாணவியை தேடி வந்தனர். ஆனால் கனிகாவை பற்றி எந்த தகவலும் கிடைக்கவில்லை.

இந்நிலையில் நேற்று காலை தென்குத்து கிராமத்தில் ராஜீ என்பவரது வீட்டு தோட்டத்தில் உள்ள கிணற்றில் பள்ளி சீருடையுடன் சிறுமியின் உடல் மிதப்பதாக போலீசுக்கு தகவல் கிடைத்தது. போலீசார் விசாரணையில் அது கனிகா என்பது தெரியவந்தது. இதையடுத்து கடலூர் எஸ்பி பகலவன், நெய்வேலி டிஎஸ்பி மணி மற்றும் போலீசார் சம்பவ இடத்திற்கு நேரில் வந்து விசாரணை நடத்தினர்.

குறிஞ்சிப்பாடி தீயணைப்பு துறையினர் உதவியுடன் கிணற்றில் இருந்து சிறுமியின் உடல் வெளியே எடுக்கப்பட்டது. பிணத்தை பார்த்த பலருக்கும் கடும் அதிர்ச்சி ஏற்பட்டது. சிறுமியின் தலை துண்டிக்கப்பட்டு, வெறும் உடல் மட்டுமே இருந்தது. கிணற்று க்குள் தலை கிடக்குமா என்று தீயணைப்பு வீரர்கள் தொடர்ந்து தேடினர். சுற்றுப்புற பகுதிகளிலும் தேடினர். ஆனால் தலை மட்டும் எங்குமே கிடைக்கவில்லை. அதை தொடர்ந்து விழுப்புரத்தில் இருந்து வரவழைக்கப்பட்ட தடயவியல் நிபுணர்கள் உதவியுடன் உடல் பரிசோதனை செய்யப்பட்டது. பண்ருட்டி அரசு மருத்துவர் எழில், சம்பவ இடத்திலேயே பிரேத பரிசோதனை மேற்கொண்டார்.

சிறுமி கனிகாவின் உடல் கிணற்றில் மிதப்பதை அறிந்த கிராம மக்கள் 100க்கும் மேற்பட்டோர் சம்பவ இடத்தில் கூடினர். குற்றவாளிகளை உடனே கைது செய்யக்கோரி வடலூர் ஆபத்தாரனபுரம் கைக்காட்டி அருகே திடீர் சாலைமறியலில் ஈடுபட்டனர். இதனால் அரைமணி நேரம் போக்குவரத்து பாதிக்கப்பட்டது. நெய்வேலி டிஎஸ்பி மணி அவர்களிடம் பேச்சுவார்த்தை நடத்தியதை தொடர்ந்து மறியல் கைவிடப்பட்டது.

நரபலியா?

சிறுமி கனிகா காணாமல் போன நாளன்றும், மறுநாளும் அப்பகுதியில் உள்ள கிணறுகளிலும் தேடுதல் வேட்டை நடத்தப்பட்டது. அப்போது கிணற்றில் சடலம் இல்லை. இந்நிலையில் நேற்று வீடுகள் நெருக்கமாக உள்ள கிராமத்தில், பிரதான சாலையை ஒட்டியுள்ள வீட்டுக்கு பின்புறம் உள்ள கிணற்றில் சிறுமியின் உடல் கண்டெடுக்கப்பட்டிருப்பது அனைவரையும் அதிர்ச்சியடைய வைத்துள்ளது. மேலும், தலையை துண்டித்து கொலை செய்திருப்பதால் நரபலியாக இருக்கலாம் என்று கூறப்படுகிறது. சிறுமியை சைக்கிளில் கூட்டிச் சென்ற வாலிபர், சிறுமியை பாலியல் பலாத்காரம் செய்து, தலையை துண்டித்து கிணற்றில் வீசியிருக்கலாம் என்றும் கூறப்படுகிறது. இந்த இரண்டு கோணங்களிலும் போலீசார் தீவிர விசாரணை நடத்தி வருகின்றனர்.

குழந்தை காணாமல் போனது முதல் அவரது பெற்றோரும் உறவினர்களும் பலரிடம் குறி கேட்ட வண்ணம் இருந்தனர். உடல் கண்டுபிடிக்கப்பட்ட நேற்றும், கனிகாவின் குடும்பத்தினர் கேரள மாநிலத்தில் ஜோதிடம் மூலம் குறி கேட்க சென்றிருந்தனர்.

அட பாவமே . :!#: