தமிழக மக்களின் உணர்வுகளுக்கு மதிப்பளித்து மூவரின் மரண தண்டனையையும் நீக்க வேண்டும்

by **நண்பன்** Thu 1 Sep 2011 - 11:40

தமிழக மக்களின் உணர்வுகளுக்கு மதிப்பளித்து மூவரின் மரண தண்டனையையும் நீக்க வேண்டும்
ஜனாதிபதியை வலியுறுத்தி ஜெயலலிதா சட்ட சபையில் கோரிக்கை
சாந்தன், முருகன், பேரறிவாளன் ஆகியோரின் கருணை மனுக்களை மறுபரிசீலனை செய்து, அவர்களின் மரண தண்டனையை ஆயுள் தண்டனையாக குறைக்க நடவடிக்கை எடுக்க வேண்டும் என வலியுறுத்தி தமிழக சட்டசபையில் நேற்று முன்தினம் தீர்மானம் நிறைவேற்றப்பட்டது.

சாந்தன், முருகன், பேரறிவாளன் ஆகியோரின் கருணை மனுக்களை மறுபரிசீலனை செய்து, மரண தண்டனையை ஆயுள் தண்டனையாக மாற்றியமைக்குமாறு, ஜனாதிபதியை வலியுறுத்தும் தீர்மானத்தை சட்ட சபையில் முதல்வர் ஜெயலலிதா முன்மொழிந்து பேசியதாவது, இந்திய அரசியல¨மைப்புச் சட்டத்தின் பிரிவுக்கூறு 72ல் தனக்குள்ள அதிகாரத்தினை பயன்படுத்தி, சுதேந்திரராஜா என்கிற சாந்தன், ஸ்ரீஹரன் என்கிற முருகன் மற்றும் பேரறிவாளன் என்கிற அறிவு ஆகியோரின் கருணை மனுக்களை ஜனாதிபதி நிராகரித்ததையடுத்து எழுந்த சூழ்நிலை குறித்தும், இந்தப் பிரச்சினையில் முதல்வர் என்ற முறையில் சட்டப்படி எனக்குள்ள அதிகாரம் குறித்து சட்டசபையில் ஓர் அறிக்கையை நான் அளித்தேன். அந்த அறிக்கையில் மூவரின் கருணை மனுக்களை முதல்வராகிய நானோ, தமிழக அரசோ, மாநில ஆளுனரோ மீண்டும் பரிசீலனை செய்ய முடியாது என்பதை தெளிவுபட கூறியிருந்தேன்.

இந்தச் சூழ்நிலையில் மூவருக்கும் தூக்குத் தண்டனை விரைவில் நிறைவேற்றப்பட்டு விடும் என்று தமிழக மக்கள் வருத்தம் அடைந்துள்ளனர்.

பல்வேறு அரசியல் கட்சிகளும் மூவரின் தூக்குத்தண்டனை ரத்து செயற்வதற்கான நடவடிக்கைகள் எடுக்கப்பட வேண்டும் என வேண்டுகோள் விடுத்து எனக்கும் இது குறித்து கோரிக்கைகள் வந்துள்ளன. எனவே, தமிழர்களின் உணர்வுக்கு மதிப்பளிக்கும் வகையில், தமிழக அரசின் சார்பில் தீர்மானத்தை முன்மொழிகிறேன்.

தமிழக மக்களின் உணர்வுகளுக்கும், தமிழகத்தில் உள்ள அரசியல் கட்சிகளின் கருத்துக்களுக்கும் மதிப்பளிக்கும் வகையில், சாந்தன், முருகன், பேரறிவாளன் ஆகியோரின் கருணை மனுக்களை மறுபரிசீலனை செய்து அவர்களின் மரண தண்டனையை ஆயுள் தண்டனையாக குறைக்க நடவடிக்கை எடுக்க வேண்டும் என, ஜனாதிபதியை சட்ட சபை வலியுறுத்திக் கேட்டுக்கொள்கிறது.

தமிழக மக்களின் உணர்வுகளை பிரதிபலிக்கும் வகையில், என்னால் முன்மொழியப்பட்ட தீர்மானத்தை ஒருமனதாக நிறைவேற்றித் தர வேண்டும். இவ்வாறு முதல்வர் ஜெயலலிதா பேசினார்.

முதல்வர் முன்மொழிந்த தீர்மானம், உறுப்பினர்களின் குரல் வாக்குப்பதிவு மூலம் நிறைவேற்றப்பட்டது. தீர்மானத்தை கூட்டணிக் கட்சிகளின் உறுப்பினர்கள், செ.கு. தமிழரசன் (இந்திய குடியரசுக் கட்சி), கிருஷ்ணசாமி (புதிய தமிழகம்) பெரிதும் பாராட்டி பேசினர்