இன்று 2-வது ஒருநாள் போட்டி: இந்தியா பதிலடி கொடுக்குமா?

by **நண்பன்** Tue 6 Sep 2011 - 10:23

இந்தியா-இங்கிலாந்து அணிகள் மோதும் 2-வது ஒருநாள் கிரிக்கெட் போட்டி
இன்று (செவ்வாய்க்கிழமை) நடக்கிறது.வீரர்களின் காயத்தால் இந்திய அணி
மிகுந்த கவலையில் உள்ளது. ஏற்கனவே டெஸ்ட் தொடரில் ஏற்பட்ட வீரர்களின் காயம்
ஒருநாள் தொடரிலும் தொடருகிறது. இதனால் 11 பேர் கொண்ட வீரர்களை தேர்வு
செய்வதில் கேப்டன் டோனிக்கு அதிக சிரமம் ஏற்பட்டுள்ளது.

கடந்த
போட்டியில் ரோகித் சர்மாவுக்கு கை விரலில் காயம் ஏற்பட்டது. இதனால்
அவருக்கு பதிலாக மனோஜ் திவாரி அணிக்கு தேர்வாகி உள்ளார். ரோகித்சர்மா
இடத்துக்கு ரவிந்திர ஜடேஜா, மனோஜ் திவாரி ஆகியோரில் ஒருவர் தேர்வு பெறலாம்
என்றாலும் டெஸ்ட் போட்டியில் பேட்டிங் மற்றும் பவுலிங்கில் சிறப்பாக
செயல்பட்ட அமித் மிஸ்ராவுக்கு வாய்ப்பு கொடுக்கப்படலாம் என்று தெரிகிறது.

முதல்
ஒருநாள் போட்டியில் பார்த்தீவ் பட்டேல், ரகானே ஆகியோரது தொடக்கம் சிறப்பாக
இருந்தது. இதனால் அவர்களே இன்று தொடக்க வீரர்களாக விளையாடுவார்கள். அதை
தொடர்ந்து ராகுல் டிராவிட், வீராட் கோலி, ரெய்னா, கேப்டன் டோனி ஆகியோர்
களம் இறங்குவார்கள். வேகப்பந்து வீரர்களில் பிரவீண்குமார், வினய்குமார்,
முனாப் பட்டேல் இடம் பெறுவார்கள்.

இங்கிலாந்து
சுற்றுப் பயணத்தில் இந்திய அணி ஒரு வெற்றி கூட பெறவில்லை. 4 டெஸ்டில்
மிகவும் மோசமாக தோற்று 0-4 என்ற கணக்கில் தொடரை இழந்தது. அதை தொடர்ந்து
நடந்த ஒரே ஒரு 20 ஓவர் போட்டியிலும் இந்தியா தோற்றது. இதனால் ஒருநாள்
தொடரில் இந்தியா பதிலடி கொடுக்குமா என்று ஆவலுடன் எதிர்பார்க்கப்பட்டது.

5
போட்டி கொண்ட ஒரு நாள் தொடரில் கடந்த 3-ந்தேதி நடந்த முதல் போட்டியில் உலக
சாம்பியனான இந்தியா 274 ரன் குவித்தும் மழையால் வாய்ப்பு பறிபோனது. அந்த
ஆட்டம் பாதியில் ரத்து செய்யப்பட்டது. இதனால் இன்றைய 2-வது ஒருநாள்
போட்டியில் டெஸ்ட், 20 ஓவர் போட்டியில் ஏற்பட்ட தோல்விக்கு பதிலடி
கொடுக்குமா? என்று எதிர்பார்க்கப்படுகிறது.

அதே
நேரத்தில் முன்னணி வீரர்களின் காயத்தால் நொண்டி குதிரையாக இருக்கும் இந்திய
அணி இங்கிலாந்தை சமாளிக்க கடுமையாக போராட வேண்டும். பகல்-இரவாக
நடைபெறும் இன்றைய ஆட்டம் இந்திய நேரப்படி 6.30 மணிக்கு தொடங்குகிறது.