தமிழகத்தில் சீமான் உட்பட 1000 பேர் கைது

தமிழகத்தில்
சீமான் உட்பட
1000 பேர் கைது


பேரறிவாளான், முருகன், சாந்தன் ஆகிய மூவரின் தூக்குத் தண்டனையை இரத்து செய்யக் கோரி
சீமான் தலைமையில் நாம் தமிழர் கட்சியினர் மேற்கொண்ட நடைப் பயணத்திற்கு காவல்துறை
அனுமதி மறுத்து விட்டது. இதனைத் தொடர்ந்து தடையை மீறி நடைப்பயணத்தைத் தொடர்ந்த
சீமான், இயக்குனர் செல்வமணி, பேரறிவாளன் தாயார் அற்புதம்மாள் உள்ளிட்ட 1000 பேரை
பொலிஸார் கைது செய்தனர்.

முன்னள் இந்திய பிரதமர் ரஜீவ் காந்தி கொலை வழக்கில் தூக்கு
தண்டனை விதிக்கப்பட்ட பேரறிவாளன், முருகன், சாந்தன் ஆகிய மூன்று குடும்பத்தினரின்
வாழ்வில் மீண்டும் விளக்கேற்றி வைத்த முதல்வர் ஜெயலலிதாவிற்கு நன்றி தெரிவித்தும்,
இவர்கள் மூன்று பேரின் மரண தண்டனையை நிரந்தரமாக நீக்க வேண்டும் என்பதை
வலியுறுத்தியும் வேலூர் முதல் சென்னை வரை சீமான் தலைமையில் பரப்புரை நடைபயணம்
ஏற்கனவே நடைபெறுவதாக அறிவிக்கப்பட்டது.
அதன்படி, நேற்று காலை வேலூர் கோட்டை பூங்காவில் இருந்து சீமானின் நடை பயணம்
தொடங்கியது. அவரது ஆதரவாளர்கள் ஆயிரக்கணக்கில் இந்தப் பேரணிக்கு திரண்டு வந்தனர்.
நாம் தமிழர் கட்சியின் தலைமை ஒருங்கிணைப்பாளர் சீமான் தலைமை வகிக்க இயக்குனர் ஆர்.கே.
செல்வமணி, ஷாகுல் அமீது உள்ளிட்ட நிர்வாகிககள் இந்தப் பேரணியில் பங்ககேற்றனர்.
வேலூர் நகர எல்லையில் சீமானின் பரப்புரை நடைப் பயணம் நெருங்கிய போது காவலர்கள்
அவர்களைத் தடுத்து நிறுத்தினர்.
நடைப் பயணத்துக்கு அனுமதி கிடையாது என்றும், மீறி பயணத்தைத் தொடர்ந்தால் கைது
செய்யப்படுவீர்கள் என்றும் காவலர்கள் எச்சரித்தனர்.
இதனைத் தொடர்ந்து தடையை மீறி நடைப் பயணத்தை தொடர்வது என தீர்மானித்த சீமான் பயணத்தை
தொடர்ந்தார். இந்த காரணத்தை கொண்டு அவரையும் அவருடன் வந்த 1000இற்கும்
மேற்பட்டவர்களையும் காவல்துறையினர் உடனடியாக கைது செய்தனர்.

தகவலுக்கு நன்றி.