சாலையோரங்களில் ஆதரவற்ற பெண்கள் ?

மெட்ரோ
நகரங்களில் சாலையோரங்களில் ஆதரவற்ற பெண்கள் பிரசவிக்கும் சம்பவங்கள் கவலை
அளிக்கிறது என்று தேசிய மனித உரிமை கமிஷன் தெரிவித்துள்ளது. டெல்லி
கன்னாட் பிளேஸ் பகுதி சங்கர் மார்க்கெட் அருகே சாலையோரத்தில் கடந்த ஆண்டு
ஆகஸ்ட் 26ம் தேதி லட்சுமி என்ற பெண்ணுக்கு பெண் குழந்தை பிறந்தது.
ஆதரவில்லாமல் அந்த பெண் இறந்து விட்டாள். குழந்தையை மீட்ட போலீசார், அதை
குழந்தைகள் காப்பகத்தில் சேர்த்தனர்.


இது
தொடர்பாக, தேசிய மனித உரிமை ஆணையத்தில் வக்கீல் ஒருவர் மனு தாக்கல்
செய்தார். அதில் மெட்ரோ நகரங்களில் ஆதரவற்ற பெண்கள் அதிகரித்து
வருவதாகவும், அவர்களில் பலர் சாலையோரங்களில் பிரசவித்து இறப்பதாகவும்
குறிப்பிட்டிருந்தார். இதை விசாரித்த ஆணையம், இது பற்றி விளக்கம் கேட்டு,
டெல்லி அரசுக்கு நோட்டீஸ் அனுப்பியது.

டெல்லி
அரசு மற்றும் போலீசார் தாக்கல் செய்த அறிக்கையில், லட்சுமிக்கு பிறந்த
குழந்தை தொண்டு நிறுவனம் நடத்தும் குழந்தைகள் காப்பகத்தில் இருப்பதாகவும்,
அங்கு குழந்தை நன்கு பராமிக்கப்படுவதாகவும் தெரிவித்தனர். இதையடுத்து,
தேசிய மனித உரிமை ஆணையம் பிறப்பித்த உத்தரவில் கூறியிருப்பதாவது:

லட்சுமி
போன்ற ஆதரவற்ற பெண்களின் எண்ணிக்கை மெட்ரோ நகரங்களில் அதிகரித்து வருவது
பெரும் கவலையளிக்கிறது. இவர்கள் எல்லோருக்கும் பாதுகாப்பு அளிப்பது என்பது
அரசால் முடியாத காரியம். ஆனால், இவர்களின் நிலைமை குறித்து மக்களிடம்
சிறிதும் அக்கறை இல்லாததுதான் வேதனை அளிக்கிறது. மக்களும், சமூக நல
ஊழியர்களும் இவர்களின் நிலைமை மீது அக்கறை கொண்டு செயல்பட்டால் மட்டுமே
நிலைமை மாறும். லட்சுமிக்கு பிறந்த குழந்தையை பாதுகாப்புடன் வளர்க்க
வேண்டியது டெல்லி அரசின் கடமை. இதற்காக எடுக்கப்படும் நடவடிக்கை குறித்து
டெல்லி அரசின் தலைமை செயலாளர் அறிக்கை தாக்கல் செய்ய வேண்டும்.
இவ்வாறு மனித உரிமை கமிஷன் உத்தரவிட்டுள்ளது.

மக்களிடம் அக்கறையில்லாதது வேதனையளிக்கிறதேன்று கூறுவது முட்டாள் தனம். இது அரசாங்கத்தின் கடமை. அரசாங்கத்திற்கு மக்களின்மேல் இருக்கவேண்டிய அக்கறை.