நவ கிரகங்கள் - 1

by **Atchaya** Sat 10 Sep 2011 - 5:54

1. சூரியன்

உலகில் அசையும் பொருட்கள், அசையாப் பொருட்கள் ஆகிய எல்லாவற்றுக்குமே ஆத்மாவாக விளங்குவது சூரியனே என்ற பொருளில் 'சூரிய ஆத்மா ஜகதஹ தஸ்து சஸ்ச்' என்று ரிக் வேதம் புகழும் சூரியனே நவக்கிரகங்களுள் முதன்மையாகும்.

'ஏஷ பிரஹ்மா ச விஷ்ணு ச சிவா ஸ்கந்த' என 'ஆதித்ய ஹ்ருதயம்' சூரியனைப் புகழ்கிறது. இதன் பொருள்:- சூரியனே பிரம்மா; விஷ்ணு; சிவன்; முருகன்; பிரஜாபதி; மகேந்திரன்; குபேரன்; காலன்; சந்திரன்; வருணன் இவை அனைத்துமாக இலங்குகிறான்.

சூரிய வழிபாடு மிகப் பழமையானது. அனைத்து தேச மக்களும் சூரியனை வழிபட்டு வந்ததை உலகச்சரித்திரம் உணர்த்துகிறது.
"அஸாவாதித்யோ ப்ரஹ்மா; ப்ரஹ்மைவாகமஸ்மி; ப்ரஹ்மைவ சத்யம்":- இந்த சூரியனே பிரம்மம்; நானும் பிரம்மமாய் இருக்கின்றேன்; பிரம்மமே சத்யம் என்று வேதம் உரைக்கிறது.

ஒருவனாக எப்போதும் சஞ்சரிப்பவன் யார் என்று மகாபாரதத்தில் யட்ச பிரச்னத்தில் கேள்வி எழுகிறது. அவன் சூரியனே என்றும் விடை கிடைக்கிறது.

மந்த்ர ராஜம் என்று மந்திரங்களில் தலை சிறந்த மந்திரமாகக் கூறப்படுவது காயத்ரி. காயத்ரிக்கு உரியவன் கதிரவன். "ஓம் தத்ஸ்விதுர்வரேண்யம் பர்கோ தேவஸ்ய தீ மஹி தியோயோனஹ ப்ரோசத்யாத்". இந்த மந்திரத்தின் அர்த்தத்தை மகாகவி பாரதியார் பின் வருமாறு மொழி பெயர்த்துள்ளார்:- செங்கதிர் தேவனின் ஒளியினைத் தேர்கின்றோம் அவன் எங்கள் அறிவினைத் தூண்டி நடத்துக.

ஒற்றைச் சக்கரம் கொண்ட தேரில் வேதத்தின் ஏழு சந்தங்களை ஏழு குதிரைகளாகக் கொண்டு பூட்டி பவனி வருகிறான் சூரியன். ஜோதிடப்படி சூரியனே பிதுர் காரகன். சுய நிலை, சுய உணர்வு, செல்வாக்கு, கெளரவம், அந்தஸ்து, வீரம், பராக்ரமம், சரீர சுகம், நன்னடத்தை ஆகியவற்றிற்குக் காரகத்துவம் சூரியனுக்கே உண்டு. கண், ஒளி, உஷ்ணம், அரசு, ஆதரவு இவற்றின் அதிபதியும் சூரியனே!

கிழக்குத் திசை சூரியனுக்கு உரியது. சூரியனின் அருளால் வடமொழி அறிவு ஏற்படும். உஷா தேவி, சாயா தேவி ஆகிய இரு தேவிகளுடன் சூரியனார் கோவிலில் சூரியன் விளங்குகிறார். அக்னி இவருக்கு அதி தேவதை. ருத்ரன் இவருக்கு பிரத்யதி தேவதை. மாணிக்கம் உகந்த ரத்தினம். ஏழு குதிரைகள் பூட்டிய ஏதமே சூரியனின் வாகனம்!

சூர்ய காயத்ரி

ஓம் அச்வ த்வஜாய வித்மஹே
பாச ஹஸ்தாய தீமஹி
தந்நோ ஸுர்ய ப்ரசோதயாத்

2. சந்திரன்

'சந்த்ரமா மனஸோ ஜா' என்று புருஷ சூக்தம் போற்றும் சந்திரனே மனதிற்கு அதிபதி. இவனே உடலுக்கு காரகன். சரீர பலம், மனோ பலம் இரண்டுமே உலக வாழ்க்கையின் வெற்றிக்கு மூல பலம் ஆகும்.

ஜனன லக்னத்தின்படி நல்ல பலன்களை ஒரு ஜாதகத்தில் காண முடியவில்லை எனில், சந்திரனை லக்னமாகக் கொண்டு பலன்களைச் சொல்ல வேண்டும் என்று விதி இருக்கிறது. இதையே 'விதி கெட்டால் மதியைப் பாரு' என்ற பழமொழி உணர்த்துகிறுது!

ஜோதிடப்படி மாத்ரு காரகன் சந்திரன். கடற்பயணம், ரசனை, அறிவு, ஆனந்தம், புகழ், அழகு, நடு நிலைமை, சுக போகம் இவற்றிற்கு காரகன் சந்திரனே! முகூர்த்தங்களை நிச்சயம் செய்வது, ஜாதக தசா இருப்பு, திருமணப் பொருத்தம் ஆகிய முக்கியமானவை அனைத்துமே சந்திரனை அடிப்படையாகக் கொண்டே நிர்ணயிக்கப்படுகின்றன.

தென் கிழக்குத் திசை சந்திரனுக்குரியது. உகந்த நிறம் வெள்ளை. சந்திரனுக்கு உரிய தலம் திங்களூர்.

விஷ்ணுவின் அம்சமான சந்திரனின் நற்பலன்களைப் பெற பெளர்ணமியன்று திருப்பதி சென்று தரிசனம் செய்து தங்கி வழிபடுவது நலம் பயக்கும்.

மூலிகைக்கு அதிபதி சந்திரன். செல்வத்தை தருபவன் என யஜுர் வேதம் சந்திரனைப் புகழ்கிறது. சந்திரன் நிற்கும் வீட்டை ராசி வீடாகக் கொண்டு இதன் முன் பின் வீடுகளை சனி கடக்கும் போது ஏற்படும் எழரை ஆண்டுகள் ‘எழரை நாட்டுச் சனி' என்று கூறப்படுகிறது.

முத்து சந்திரனுக்கு உகந்த ரத்தினம். வெள்ளைக்குதிரை சந்திரனின் வாகனம்!

சந்திர காயத்ரி
ஓம் க்ஷீரபுத்ராய வித்மஹே
அம்ருதயாய தீமஹி
தந்நோ சந்திர: ப்ரசோதயாத்

3. செவ்வாய்

அங்காரகன், குஜன், மங்களன், பெளமன், உக்கிரன் என்று பல பெயர்களால் அழைக்கப்படும் செவ்வாய் நவக்கிரகங்களுள் மூன்றாவது இடத்தைப் பெறுபவன்.

சகோதர காரகன் இவனே. ரத்தத்திற்கு காரகன் செவ்வாய். உடல் உறுதி, மன உறுதி தருபவன் செவ்வாய். உஷ்ணம், கோபம், எரிபொருள் ஆகியவற்றிற்கு உரியவன் செவ்வாய்.

கண்டிப்பதும் இவனே, தண்டிப்பதும் இவனே. மாபெரும் போர் வீரர்களை வழி நடுத்துபவன். பெரும் விளையாட்டு வீரர்களுக்கு அருள்பாலிப்பவன். செந்நிறத்தோல் அழகன், கடும் பார்வை உடையவன், பொறுமை அற்றவன். தெற்கு திசை செவ்வாய்க்கு உரியது.

அங்காரகன் பூசித்த தலங்கள் மூன்று. அவை: 1. திருச்சிறுகுடி 2. திருப் புள்ளிருக்கு வேளூர் என முன்பு அழைக்கப்பட்ட வைத்தீஸ்வரன் கோவில் 3. பழனி

வழிபடுவோரின் விருப்பத்தை பூர்த்தி செய்பவன் இவன். தேசத்தை வழி நடத்தும் தலைவர்கள், படை தளகர்த்தர்கள், தீ போல சுட்டெரித்து தூய்மையை விரும்புவோர் ஆகியோரின் நாயகன் செவ்வாய். பவளமே செவ்வாய்க்கு உகந்த ரத்தினம். ஆட்டுக்கிடா செவ்வாயின் வாகனம்.

அங்காரக காயத்ரி

ஓம் அங்கார காய வித்மஹே
சக்தி ஹஸ்தாய தீமஹி
தந்நோ பெளம: ப்ரசொதயாத்

நன்றி நாகராஜன் & நிலாச்சாரல்