பாக்., நம்பத் தகுந்த கூட்டாளி இல்லை:அமெரிக்க துணை அதிபர் சொல்கிறார்

வாஷிங்டன்:"பயங்கரவாதத்துக்கு எதிரான போரில், பாகிஸ்தான் நம்பத் தகுந்த கூட்டாளி அல்ல. அமெரிக்கா அல்லது அல் - குவைதா இரண்டில் ஒன்றைத் தேர்ந்தெடுப்பதில், அந்நாடு தோல்வி அடைந்து விட்டது' என, அமெரிக்கத் துணை அதிபர் ஜோ பிடன் தெரிவித்துள்ளார்.இதுகுறித்து அவர், சி.என்.என்., செய்தி நிறுவனத்துக்கு அளித்த பேட்டியில் கூறியதாவது:பயங்கரவாத எதிர்ப்பு நடவடிக்கைகளில், பாக்., இன்னும் ஆர்வம் காட்ட வேண்டும். அமெரிக்கா அல்லது அல் - குவைதா இரண்டில் ஒன்றைத் தேர்ந்தெடுப்பதில், பாக்., அல் - குவைதாவைத் தேர்ந்தெடுத்தது.

அதன் விளைவு, ஆப்கானிஸ்தானில் அமெரிக்க வீரர்கள் பலியாக வேண்டியுள்ளது. பல்வேறு சந்தர்ப்பங்களில், பாக்., அமெரிக்காவுக்கு உதவியுள்ளது. ஆனால், அது போதுமானதல்ல. அல் - குவைதாவுக்கு பெருத்த சேதத்தை அமெரிக்கா விளைவித்துள்ளது.இவ்வாறு, பிடன் தெரிவித்தார்.இதற்கிடையில், கடந்த 11ம் தேதி அன்று, அமெரிக்காவில் இருந்து வெளிவரும், "வால் ஸ்டீட் ஜர்னல்' பத்திரிகையில், பாகிஸ்தான் முழுப்பக்க அளவில் விளம்பரம் அளித்திருந்தது.

அதில், "பயங்கரவாதத்தால் அதிகளவில் பாதிக்கப்பட்ட நாடு பாகிஸ்தான்' எனக் குறிப்பிடப்பட்டு, பாகிஸ்தானில் பயங்கரவாதிகளால் கொல்லப்பட்டோரின் எண்ணிக்கை அளிக்கப்பட்டிருந்தது. விளம்பரத்தின் கீழ் பகுதியில், முன்னாள் பிரதமர் பெனசிர் புட்டோ கையசைப்பது போன்ற படம் இடம் பெற்றிருந்தது.இந்த விளம்பரத்தை, அமெரிக்கர்கள் தங்கள் இணையதளங்களில் கிண்டல் செய்துள்ளனர். "தலிபான்கள், அல் - குவைதா, ஐ.எஸ்.ஐ., ஆகியவற்றுக்கு இடம் அளித்துக் கொண்டே, இப்படி பேசுவதற்கு பாகிஸ்தானால் தான் முடியும்' என்று தெரிவித்துள்ளனர்.