பங்குச் சந்தையில் ஏற்றம் : "சென்செக்ஸ்' 242 புள்ளிகள் உயர்ந்தது

மும்பை : நாட்டின் பங்கு வர்த்தகம், புதன்கிழமை
நன்கு இருந்தது. ஆசியப் பங்குச் சந்தைகளின் எழுச்சி காரணமாக, வர்த்தகத்தின்
தொடக்கத்தில் ஏற்றம், காணப்பட்டது. பின்னர், இதர ஆசிய சந்தைகள் வீழ்ச்சி
கண்டதால் நாட்டின் பங்குச் சந்தையும் சரிந்தது. இந்நிலையில் ரூபாய்க்கு
எதிரான டாலரின் மதிப்பு உயர்ந்ததையடுத்து, தகவல் தொழில்நுட்பத் துறை
சார்ந்த பங்குகள் அதிக அளவில் கைமாறின. இதையடுத்து பங்குச் சந்தை மீண்டும்
சூடு பிடிக்கத் தொடங்கியது.
இந்நிலையில், செவ்வாயன்று வீழ்ச்சி கண்ட ஐரோப்பிய பங்குச் சந்தைகள்,
நேற்று எழுச்சி கண்டன. சர்வதேச பங்குச் சந்தைகளில் ஏற்பட்டு வரும் இந்த
திடீர் மாற்றங்கள், முதலீட்டாளர்களிடையே ஒரு வித பதற்றத்தை ஏற்படுத்துவதாக
உள்ளது என பங்குத் தரகர் ஒருவர் தெரிவித்தார். நேற்று பல துறைகளைச்
சேர்ந்த நிறுவனப் பங்குகளின் விலை, அதிகரித்து காணப்பட்டது.
உலோகம், எண்ணெய், எரிவாயு, ரியல் எஸ்டேட், வங்கி உள்ளிட்ட பல துறைகளைச்
சேர்ந்த நிறுவனப் பங்குகள், அதிக விலைக்கு கைமாறின. இருப்பினும், பொறியியல்
துறையைச் சேர்ந்த நிறுவனப் பங்குகளுக்கு தேவை குறைவாக இருந்தது.
மும்பை பங்குச் சந்தையின் குறியீட்டு எண் வர்த்தகம் முடியும் போது, 242.16
புள்ளிகள் அதிகரித்து, 16,709.60 புள்ளிகளில் நிலைகொண்டது. வர்த்தகத்தின்
இடையே, இப்பங்குச் சந்தையின் குறியீட்டு எண் அதிகபட்சமாக, 16,754.22
புள்ளிகள் வரையிலும், குறைந்தபட்சமாக, 16,387.38 புள்ளிகள் வரையிலும்
சென்றது. "சென்செக்ஸ்' கணக்கிட உதவும், 30 நிறுவனங்களுள், 6 நிறுவனப்
பங்குகளின் விலை தவிர, ஏனைய 24 நிறுவனப் பங்குகளின் விலை அதிகரித்து
இருந்தது.
தேசிய பங்குச் சந்தையின் குறியீட்டு எண் "நிப்டி' 71.60 புள்ளிகள்
அதிகரித்து, 5,012.55 புள்ளிகளில் நிலைபெற்றது. வர்த்தகத்தின் இடையே
அதிகபட்சமாக, 5,026.15 புள்ளிகள் வரையிலும், குறைந்தபட்சமாக, 4,917.40
புள்ளிகள் வரையிலும் சென்றது.

நன்றி பகிர்வுக்கு