பங்கு சார்ந்த பரஸ்பர நிதித் திட்டங்களில் ரூ.2,000 கோடி முதலீடு

by **நேசமுடன் ஹாசிம்** Thu 15 Sep 2011 - 6:57

மும்பை : சென்ற ஆகஸ்ட் மாதத்தில், பங்கு சார்ந்த,
பரஸ்பர நிதி திட்டங்களில், 2 ஆயிரம் கோடி ரூபாய் அளவிற்கு, முதலீடு
மேற்கொள்ளப்பட்டுள்ளது. பங்குச் சந்தை வீழ்ச்சியால், சிறந்த நிறுவனங்களின்
பங்குகள் விலை குறைந்துள்ளது. இதனையடுத்து, பங்கு சார்ந்த பரஸ்பர நிதி
திட்டங்களில் முதலீடு அதிகரித்திருப்பதாக, இந்திய பரஸ்பர நிதியங்களின்
கூட்டமைப்பு வெளியிட்டுள்ள அறிக்கையில் தெரிவிக்கப்பட்டுள்ளது.
சென்ற ஆகஸ்ட் மாதத்தில், பரஸ்பர நிதி துறையிலிருந்து, 14 ஆயிரத்து, 597
கோடி ரூபாய் திரும்பப் பெறப்பட்டுள்ளது. இதில் பங்கு சார்ந்த பரஸ்பர நிதி
திட்டங்களின் பங்கு, 1,986 கோடி ரூபாயாக உள்ளது. இது, சென்ற ஜூலை மாதம்,
729 கோடி ரூபாய் என்ற அளவிற்கு இருந்தது.
எனினும் பரஸ்பர நிதி நிறுவனங்கள் நிர்வகிக்கும் சொத்து மதிப்பு, சென்ற
ஆகஸ்ட் மாதம், 4.32 சதவீதம் குறைந்து, 6 லட்சத்து, 96 ஆயிரம் கோடி ரூபாய்
என்ற அளவில் குறைந்துள்ளது. இது, சென்ற ஜூலை மாதம், 7 லட்சத்து, 28 ஆயிரம்
கோடி ரூபாயாக இருந்தது. பங்குகள் விலை குறைந்துள்ளதால், அவற்றில் முதலீடு
செய்யக் கூடிய பரஸ்பர நிதி திட்டங்களில், முதலீடு செய்வதில் சில்லறை
முதலீட்டாளர்கள் ஆர்வம் காட்டி வருகின்றனர். எஸ்.ஐ.பி முறையில்,
மாதந்தோறும் ஒரு தொகையை இத்திட்டங்களில் முதலீடு செய்கின்றனர் என,
இத்துறையை சேர்ந்தவர்கள் தெரிவித்தனர்
சென்ற ஆகஸ்ட் மாதம், பங்கு சார்ந்த பரஸ்பர நிதி திட்டங்களில், 1,942 கோடி
ரூபாய் முதலீடு செய்யப்பட்டுள்ளது. கோல்டு ஈ.டி.எப் திட்டங்களில், 494
கோடி ரூபாயும், பேலன்ஸ்டு பண்டு திட்டங்களில், 210 கோடி ரூபாயும், பங்கு
சார்ந்த சேமிப்பு திட்டங்களில், 44 கோடி ரூபாயும் முதலீடு
செய்யப்பட்டுள்ளது.
அதே சமயம், இதே காலத்தில், வருவாய் திட்டங்களில், 6,925 கோடி ரூபாயும்,
லிக்யுட் பண்டு திட்டங்களில், 10 ஆயிரத்து, 66 கோடி ரூபாயும், கில்ட்
திட்டங்களில், 86 கோடி ரூபாயும் முதலீடு செய்யப்பட்டுள்ளது. இதர ஈ.டி.எப்
திட்டங்களில், 147 கோடி ரூபாயும், வெளிநாடுகளில் முதலீடு செய்யக் கூடிய,
பண்டு ஆப் பண்டு திட்டங்களில், 63 கோடி ரூபாயும் முதலீடு
செய்யப்பட்டுள்ளதாக, அறிக்கையில் தெரிவிக்கப்பட்டுள்ளது.