திருமணமான 10 நாளில் இளைஞர் கொலை?

by **நேசமுடன் ஹாசிம்** Sat 24 Sep 2011 - 6:18

திருமணமான, 10 நாளில் அடித்துக் கொல்லப்பட்டதாகவும், கொலையாளிகளை கைது செய்யவேண்டும் எனக்கூறி, இளைஞரின் உறவினர்கள், நேற்று மாலை சாலை மறியலில் ஈடுபட்டனர். அதனால், மூன்று மணி நேரம் போக்குவரத்து பாதித்தது.இடைப்பாடி தாலுகா, வெள்ளாளபுரம் பகுதியை சேர்ந்தவர் பழனிசாமி மகள் ரேவதி(21). இவர், தாரமங்கலத்தில் உள்ள தனியார் கல்லூரியில் படித்து வந்தார். ரேவதியும், தாரமங்கலம் பகுதியை சேர்ந்த லிங்கம் மகன் வெங்கடேஷ்(29) என்பவரும், காதலித்து வந்துள்ளனர்.அண்ணன், தங்கை உறவாக இருந்ததால், இரு வீட்டாரும் காதலுக்கு எதிர்ப்பு தெரிவித்துள்ளதாக கூறப்படுகிறது. இந்நிலையில், கடந்த, 10 நாட்களுக்கு முன்பு, இருவரும் வீட்டை விட்டு வெளியேறி, பழனி முருகன் கோவிலில் திருமணம் செய்து கொண்டனர்.பின், இருவரும் திண்டுக்கல்லில் தங்கி குடும்பம் நடத்தியுள்ளனர். இருவரும் திண்டுக்கல்லில் இருப்பது, ரேவதி வீட்டாருக்கு தெரிய வந்துள்ளது. ரேவதியின் உறவினர்கள் திண்டுக்கல்லுக்கு சென்று வெங்கடேஷை தாறுமாறாக தாக்கியதாக கூறப்படுகிறது.ரேவதியை மிரட்டி கூட்டி வந்துள்ளனர்.

ரேவதியின் உறவினர்கள் தாக்கியதில் பலத்த காயம் அடைந்த வெங்கடேஷ், திண்டுக்கல் அரசு மருத்துவமனையில் சேர்க்கப்பட்டு சிகிச்சை பலனின்றி இறந்தார். இது குறித்து, வெங்கடேசனின் தந்தை லிங்கம், திண்டுக்கல் போலீஸில் புகார் கொடுத்தார்.
வழக்கு பதிவு செய்து போலீஸார், விசாரணை நடத்தி வருகின்றனர். இந்நிலையில், திண்டுக்கல்லில் இருந்து வெங்கடேஷின் உடலை பெற்ற அவரது உறவினர்கள், வெங்கடேஷை கொலை செய்த ரேவதி குடும்பத்தினர் மீது நடவடிக்கை எடுக்கக்கோரி, நேற்று சின்னப்பம்பட்டி-தாரமங்கலம் மெயின்ரோட்டில் சாலை மறியலில் ஈடுபட்டனர்.தகவலறிந்த ஓமலூர் தாசில்தார் பாலசுப்ரமணியம், இடைப்பாடி தாசில்தார் ராஜன், ஓமலூர் டி.எஸ்.பி., முத்துகருப்பன், சங்ககிரி டி.எஸ்.பி., ராமசாமி ஆகியோர் சம்பவ இடத்துக்கு சென்று சாலை மறியல் ஈடுபட்டவர்களிடம் பேச்சுவார்த்தை நடத்தினர்.அப்போது, வெங்கடேஷன் சாவுக்கு காரணமானவர்கள் மீது நடவடிக்கை எடுக்கப்படும் என அதிகாரிகள் உறுதியளித்தை தொடர்ந்து, சாலை மறியல் கைவிடப்பட்டது. சாலை மறியல் போராட்டத்தால், தாரமங்கலம-சங்ககிரி நெடுஞ்சாலையில் மூன்று மணி நேரம் போக்குவரத்து பாதித்தது.