விற்பனையை அதிகரிக்க சலுகைகளை வாரி வழங்கும் கார் நிறுவனங்கள்

கார் தயாரிப்பு நிறுவனங்கள், கார் விற்பனையை அதிகரிக்கும் பொருட்டு, கவர்ச்சிகரமான சலுகைகளையும், திட்டங்களையும் அறிவித்துள்ளன. நாட்டின் கார் விற்பனை, சென்ற ஜூலை மாதம் 16 சதவீதமாகவும், ஆகஸ்ட் மாதம் 10 சதவீதம் என்ற அளவிலும் குறைந்துள்ளது. பெட்ரோல், டீசல் விலை உயர்வு, வட்டி அதிகரிப்பு உள்ளிட்ட காரணங்களால், நாட்டின் வாகன விற்பனை மந்தமடைந்துள்ளது. இந்நிலையில், பண்டிகைக் காலம் நெருங்குவதையொட்டி, கார் தயாரிப்பு நிறுவனங்கள், விற்பனையை அதிகரிக்க பல்வேறு நடவடிக்கைகளை மேற்கொண்டுள்ளன. இது குறித்து, வோக்ஸ்வேகன் இந்தியா நிறுவனத்தின் இயக்குனர் (பயணிகள் கார் பிரிவு) நீரஜ் கர்க் கூறும் போது,"சென்ற ஜூலை மற்றும் ஆகஸ்ட் மாதங்களில், வாகன சந்தை மந்தமடைந்தது. அதனால் விற்பனையை அதிகரிக்க பல்வேறு ஊக்கமளிப்பு திட்டங்களை அறிமுகப்படுத்தியுள்ளோம். இதன்படி, "போலோ' மற்றும் "வென்டோ' கார்களுக்கான உத்தரவாத காலத்தை நீட்டித்துள்ளோம். மேலும், 40 ஆயிரம் ரூபாய் மதிப்பிற்கு காப்பீடு அல்லது உதிரிபாகங்களை வழங்குகிறோம்' என்று தெரிவித்தார். வோக்ஸ்வேகன் இந்தியா நிறுவனம், அதன் கார் விற்பனையை அதிகரிக்கும் பொருட்டு, நாடு முழுவதும் உள்ள அதன் விற்பனை நிலையங்களில், சென்ற வாரம் பிரசாரம் மேற்கொண்டது. அப்போது, இந்நிறுவனத்தின் "பிரீஸ்' வரிசையை சேர்ந்த "போலோ' மற்றும் "வென்டோ' கார்களில், திசை காட்டி, வாகனத்தின் பின்புற நகர்வை கட்டுப்படுத்தும் சாதனம், தோல் இருக்கைகள் ஆகியவை இலவசமாக வழங்கப்பட்டன. "இத்தகைய சலுகைகளால், வாகனங்களை விசாரிக்க வருவோரின் எண்ணிக்கை, இரு மடங்காக அதிகரித்துள்ளது. வழக்கமாக, பண்டிகைக் காலங்களில் மாதாந்திர விற்பனை, 10 சதவீதம் அதிகரிக்கும். ஆனால் தற்போது, "ஷ்ராத்' காலம் அனுசரிக்கப்படுவதால் தேவை குறைந்துள்ளது' என நீரஜ் கர்க் மேலும் தெரிவித்தார். ஜெனரல் மோட்டார்ஸ் இந்தியா நிறுவனம், செவர்லட் பிராண்டுகளில் பீட், ஸ்பார்க் உள்ளிட்ட கார்களை விற்பனை செய்து வருகிறது. இந்நிறுவனத்தின் இயக்குனர் மற்றும் துணைத்தலைவர் (கார்ப்பரேட் விவகாரங்கள்) பி.பாலேந்திரன் கூறுகையில்,"பண்டிகைக் காலங்களில் வழக்கத்தை விட, விற்பனை 20 சதவீதம் அதிகரிக்கும். ஆனால், வட்டி உயர்வு, பெட்ரோல் விலை அதிகரிப்பு உள்ளிட்ட காரணங்களால், 5 சதவீத அளவிற்கே விற்பனை அதிகரிக்க வாய்ப்புள்ளது' என்று தெரிவித்தார். ஜெனரல் மோட்டார்ஸ் நிறுவனம், இலவச பராமரிப்பு, காப்பீடு, ரொக்கத் தள்ளுபடி உட்பட 15 ஆயிரம் ரூபாய் முதல் 55 ஆயிரம் ரூபாய் வரை சலுகை விலையில் கார்களை விற்பனை செய்கிறது. ஹோண்டா சீயல் நிறுவனம் அதன் "ஹோண்டா சிட்டி' கார் விலையில், 66 ஆயிரம் ரூபாய் வரை தள்ளுபடி வழங்குகிறது. போட்டியை சமாளிக்கும் பொருட்டு, மேம்படுத்தப்பட்ட "ஜாஸ்' காரை முந்தைய விலையை விட, 1 லட்சத்து, 50 ஆயிரம் ரூபாய் வரை குறைத்து விற்பனை செய்கிறது. மேலும், பண்டிகை காலத்தை முன்னிட்டு, மாதம் 9,999 ரூபாய் தவணையில் "ஹோண்டா சிட்டி' காரை விற்பனை செய்யும் திட்டத்தையும் அறிமுகப்படுத்தியுள்ளது. ஹோண்டா நிறுவனம், விரைவில், 5 லட்ச ரூபாய்க்கும் குறைவான விலையில் "பிரையோ' என்ற சிறிய காரை அறிமுகப்படுத்த உள்ளது. இந்நிறுவனத்தின் மலிவு விலை கார் என்ற சிறப்பை, இந்த கார் பெறும் என, இந்நிறுவனத்தை சேர்ந்த ஒருவர் தெரிவித்தார். ஹூண்டாய் நிறுவனம் "இயான்' என்ற சிறிய காரை, விரைவில் இந்தியாவில் அறிமுகப்படுத்த உள்ளது. 814 சி.சி திறன் கொண்ட இன்ஜின் பொருத்தப்பட்ட இந்த கார், உலகில் அதிகளவில் விற்பனையாகும் மாருதி சு‹கியின் "ஆல்டோ' காருக்கு கடும் போட்டியாக உருவெடுக்கும் என்று எதிர்பார்க்கப்படுகிறது.