யாழ். குடாவில் பெண்களுக்கு எதிரான வன்முறைகள் அதிகரிப்பு

by **நண்பன்** Wed 28 Sep 2011 - 13:35

யாழ். குடாவில் பெண்களுக்கு எதிரான வன்முறைகள் அதிகரிப்பு
தகவல்களை வெளிப்படுத்துவேன் என்கிறார் யாழ். அரசாங்க அதிபர்
மகேஸ்வரன் பிரசாத்
யாழ். குடாநாட்டில் பெண்களுக்கு எதிரான பாலியல் சேஷ்டைகள் மற்றும் வன்முறைகள் அதிக ரித்திருப்பதாகக் கூறும் யாழ். மாவட்ட அரசாங்க அதிபர் இமெல்டா சுகுமார், இவ்வாறு சேஷ்டைகளில் ஈடுபடுபவர்கள் பற்றிய தகவல்களை பகிரங்கப்படுத்துவதற்குத் தயாராக விருப்பதாகக் கூறியுள்ளார்.

யாழ். குடாநாட்டிலுள்ள பாடசாலைகள், பல்கலைக்கழகம் மற்றும் அலுவலகங்களில் பெண்களுக்கு எதிரான பாலியல் சேஷ்டைகள் அதிகரித்துள்ளன. அங்கு இடம்பெறும் சேஷ்டைகள் பற்றித் தனக்கு இரகசியமான முறைப்பாடுகள் கிடைத்துள்ளன. இவற்றில் ஈடுபட்டுள்ளவர்கள் பற்றிய விபரங்களை விரைவில் பகிரங்கப்படுத்த விருப்பதாகவும் அவர் தினகரனுக்குத் தெரிவித்தார்.

இந்த விடயம் தொடர்பில் மேலும் கருத்துத் தெரிவித்த யாழ் அரசாங்க அதிபர், யாழ் குடாநாட்டில் பெண்களுக்கு எதிரான வன்முறைகளும், பாலியல் சேஷ்டைகளும் அதிகரித்துள்ளன. இதில் ஈடுபடுபவர்கள் பற்றிய இரகசிய முறைப்பாடுகள் எனக்குக் கிடைத்துள்ளன. இந்தத் தகவல்களை விரைவில் நான் பகிரங்கப்படுத்த எதிர்பார்த்துள்ளேன்.

பாலியல் சேஷ்டைகளால் பாதிக்கப்பட்ட பல பெண்கள் தற்கொலைக்கு முயற்சித்துள்ளனர்.

இது பற்றிய தகவல்கள் ஊடகங்களில் வெளியாகவில்லை. நான் யாழ் மாவட்ட அரசாங்க அதிபராகப் பதவியேற்ற பின்னர் 8,9 பெண்கள் கொல்லப்பட்டுள்ளனர். காமவெறி பிடித்தவர்களின் நடவடிக்கைகளாலேயே இவர்கள் கொல்லப்பட்டுள்ளனர். அண்மையில் பாதிக்கப்பட்ட மாணவி ஒருவரை எனது அதிகாரிகள் விசாரித்து அறிக்கையொன்றை சமர்ப்பித்துள்ளனர்.

நன்கு தமிழ் பேசக்கூடியவர்களாலேயே தான் பாலியல் துன்புறுத்தலுக்கு உள்ளானதாக அம்மாணவி கூறியுள்ளார். கணவன்மார் தமது மனைவிமாரை சரியான முறையில் நடத்தாமையாலேயே விவாகரத்துவரை பெண்கள் செல்லவேண்டி ஏற்படுகிறது.

பெண்களுக்கு எதிரான வன்முறைகள் மற்றும் பாலியல் சேஷ்டைகளைக் கட்டுப்படுத்துவதற்கு உரிய நடவடிக்கை எடுக்க வேண்டுமென நான் பாதுகாப்புத் தரப்பினரிடமும் கோரிக்கை விடுத்துள் ளேன். இவற்றுக்கு எதிராக நானும் நடவடிக்கை எடுக்கவுள்ளேன். முதலில் இவ்வாறான சேஷ்டைகளில் ஈடுபடுபவர்கள் பற்றிய விபரங்களைப் பகிரங்கப்படுத்துவதற்குத் தயாராகவுள்ளேன் என்று கூறினார்.