மனைவியை கொன்றவருக்கு ஆயுள் சிறை

கயிற்றால் கழுத்தை இறுக்கி, மனைவியை கொலை செய்த கூலித் தொழிலாளிக்கு, கோவை விரைவு கோர்ட் ஆயுள் தண்டனை விதித்தது. மதுக்கரை, குமிட்டிபதியைச் சேர்ந்தவர் மகேஸ்வரன் (எ) செல்வராஜ்(35); கூலித்தொழிலாளி. இவரது மனைவி சாந்தாமணி. இவர்களுக்கு இரு மகன்கள் உள்ளனர். தினமும் மது போதையில் வீடு திரும்பும் செல்வராஜ், மனைவியை அடித்து துன்புறுத்துவதை வழக்கமாக கொண்டிருந்தார். மனமுடைந்த சாந்தாமணி, குழந்தைகளை கணவனிடமே ஒப்படைத்து விட்டு, பிரிந்து சென்று விட்டார். இதனைத் தொடர்ந்து குழந்தைகளை பராமரிப்பதற்காக கோவையைச் சேர்ந்த லதா (எ) மணியாள் (33) என்பவரை தனது வீட்டுக்கு அழைத்து வந்தார். நாளடைவில் இவரையே மனைவியாக்கிக் கொண்டார். ஆனாலும், முதல் மனைவியின் குழந்தைகளுக்கு சரியாக உணவு கொடுப்பதில்லை. பள்ளிக்கு அனுப்புவதில்லை. இதுபற்றி வேலையில் இருந்து திரும்பும் அப்பாவிடம் மகன்கள் புகார் செய்தனர். ஆத்திரமடைந்த செல்வராஜ், மணியாளை தகாத வார்த்தைகளால் திட்டி, அடித்து உதைத்தார். இதன்பின், குடும்பத்தோடு, குமிட்டிபதியில் இருந்து பெரியநாயக்கன்பாளையம் சென்று, வி.எம்.பண்ணையில் வேலைக்கு சேர்ந்தனர். ஆனாலும், சிறுவர்களை துன்புறுத்துவதை மணியாள் நிறுத்தவில்லை. கடந்த 2010, டிச.,15 அன்று சிறுவன் வல்லரசுக்கு உணவு கொடுக்கவில்லை. பள்ளிக்கும் அனுப்பவில்லை. தகவல் அறிந்து கோபத்துடன் வீட்டுக்கு வந்த செல்வராஜ், மகன்கள் முன்னிலையில் மனைவியை அடித்து, உதைத்ததோடு, அருகில் கிடந்த கயிற்றால் கழுத்தை இறுக்கி கொலை செய்தார். பெரியநாயக்கன்பாளையம் போலீசார் விசாரித்து செல்வராஜை கைது செய்தனர். இவ்வழக்கு கோவை முதலாவது விரைவு நீதிமன்றத்தில் நடந்தது. அரசு தரப்பில் கூடுதல் அரசு வக்கீல் அகஸ்டஸ் ஆஜரானார். நீதிபதி ராமமூர்த்தி வழக்கை விசாரித்து, குற்றம் சாட்டப்பட்ட செல்வராஜூக்கு ஆயுள் தண்டனையும், 500 ரூபாய் அபராதமும் விதித்து தீர்ப்பு கூறினார்.

நன்றி பகிர்வுக்கு