நெல்லை மாநகராட்சி மேயர்: இ.யூ. முஸ்லிம் லீக்கின் பரிதாப நிலை

வாக்காளர் பட்டியலில் பெயர் இல்லாததால் நெல்லை மாநகராட்சி மேயர் பதவிக்கு வேட்பு மனுத்தாக்கல் செய்திருந்த இந்திய யூனியன் முஸ்லிம் லீக் கட்சியின் வேட்பாளர் காதர்பீவியின் மனு தள்ளுபடி செய்யப்பட்டது.

தமிழகத்தில் உள்ளாட்சி தேர்தல் அக். 17, 19 ஆகிய தேதிகளில் இரண்டு கட்டமாக நடத்தப்படுகிறது. நெல்லை மாநகராட்சியில் மேயர் மற்றும் கவுன்சிலர் பதவிகளுக்கான வேட்பு மனுத்தாக்கல் செய்யப்பட்டு மனு பரீசிலனை நேற்று முடிந்தது.

இந்திய யூனியன் முஸ்லிம் லீக் கட்சி சார்பில் மேயர் பதவிக்குக் காதர்பீவி என்பவர் வேட்பு மனுத்தாக்கல் செய்திருந்தார். ஆனால் மாநகராட்சி எல்லைக்குள் வாக்காளர் பட்டியலில் அவரது பெயர் இல்லை எனக்கூறி மனுவுக்கு ஆட்சேபனை தெரிவிக்கப்பட்டது. இதற்கு காதர்பீவி, "வாக்காளர் பட்டியலில் பெயர் சேர்ப்பதற்கு மனுச் செய்திருப்பதாக" தெரிவித்தார்.

இதைத்தொடர்ந்து மாநகராட்சி தேர்தல் அலுவலர் அஜய்யாதவ் நேற்று காலை 11 மணிக்குள் வாக்காளர் பட்டியலில் பெயர் சேர்த்ததற்கான ஆவணங்களைச் சமர்பிக்கும்படி கூறியிருந்தார். அதன்படி நேற்று காலை மாநகராட்சி அலுவலகத்திற்குக் காதர்பீவி வந்தார். ஆனால் ஆவணங்கள் எதையும் அவர், தேர்தல் அலுவலரிடம் ஒப்படைக்கவில்லை. இதைத்தொடர்ந்து அவரது மனுவைத் தள்ளுபடி செய்வதாக தேர்தல் அலுவலர் அஜய்யாதவ் அறிவித்தார்.

இதுகுறித்து மேலும் அவர் கூறுகையில், "நெல்லை மாநகராட்சி மேயர் பதவிக்கு 40 மனுக்கள் வந்துள்ளன. இவற்றில் 19 மனுக்கள் தகுதியானவை ஆகும். நேற்று வேட்பு மனுபரிசீலனையின் போது 2 மனுக்கள் தள்ளுபடி செய்யப்பட்டன. காதர்பீவியின் மனுவில் வாக்காளர் பட்டியலில் அவரது பெயர் இல்லாதது குறித்து சர்ச்சை கிளம்பியது. அவருக்குக் கொடுக்கப்பட்ட கால அவகாசத்தில் ஆவணங்களைச் சமர்பிக்காததால் அவரது மனுவும் தள்ளுபடி செய்யப்படுகிறது. தற்போது 16 மேயர் வேட்பாளர்கள் களத்தில் உள்ளனர்" என்றார்.

இதுகுறித்து காதர்பீவி கூறும்போது, "எனக்கு கொடுக்கப்பட்ட கால அவகாசத்தில் ஆவணங்களைச் சமர்ப்பிக்க முடியவில்லை. இதுசம்பந்தமாக உயர் நீதிமன்றத்தில் பெறப்பட்ட உத்தரவையும் அதிகாரிகள் ஏற்றுக்கொள்ளவில்லை. உள்ளாட்சி தேர்தலில் போட்டியிடும் வேட்பாளர்களின் பெயர்கள் அந்தப் பகுதியில் உள்ள வாக்காளர் பட்டியலில் இருக்கவேண்டும் என்ற விவரம் எனக்குத் தெரியாது. தெரிந்த பிறகு நீதிமன்றத்தின் உதவியை நாடினேன். தற்போது 7 நாட்கள் கழித்துத்தான் பெயர் சேர்க்கமுடியும் என அதிகாரிகள் தெரிவித்துள்ளனர். வாக்காளர் பட்டியலில் பெயர் இல்லை என காரணம் காட்டி எனது மனுவைத் தள்ளுபடி செய்துள்ளனர். இதுகுறித்து கட்சி தலைமைக்குத் தெரிவித்துள்ளேன். அடுத்தகட்ட நடவடிக்கை குறித்து கட்சி தலைமை முடிவு செய்யும்" என்றார்.