முதல் மனைவியை ஏமாற்றி 2-வது திருமணம் செய்ததாக டி.வி. நடிகர் மீது புகார்!

முதல் மனைவியை ஏமாற்றி 2-வது திருமணம் செய்து கொண்டதாக தொலைக்காட்சி நடிகர் டிங்குமீது புகார் தெரிவிக்கப்பட்டுள்ளது. இது தொடர்பாக தொடரப்பட்ட வழக்கில் டிங்கு முன்ஜாமீன் கேட்டு சென்னை செசன்சு நீதிமன்றத்தில் மனு தாக்கல் செய்துள்ளார். தொலைக்காட்சி நடிகர் அருண்காந்த் என்கிற டிங்குவிற்கு எதிராக அவரது மனைவி சுப்ரியா சென்னை திருமங்கலம் காவல்துறையில் புகார் ஒன்று கொடுத்துள்ளார். அதில் கூறப்பட்டிருப்பதாவது:

"நான் கலை நிகழ்ச்சி ஒன்றில் டிங்குவைப் பார்த்தேன். அவரைப் பார்த்ததும் காதல் வயப்பட்டேன். இருவரும் காதலித்து வந்தோம். இருவரும் கடந்த 2000-ம் ஆண்டு பதிவு திருமணம் செய்துகொண்டோம். டிங்குவின் குடும்பத்தினர் கேட்டுக்கொண்டதால், எங்களது திருமணத்தை எனது பெற்றோர் விமரிசையாக நடத்தி வைத்தனர். அப்போது என் பெற்றோர் ரூ.30 லட்சம் மதிப்புள்ள 100 பவுன் தங்க நகைகள், வைர நகைகள் எனக்குப் போட்டனர். 15 கிலோ வெள்ளிப் பொருட்களும் கொடுத்தார்கள். டிங்குவின் கல்யாண உடைக்காக மட்டும் ரூ.75 ஆயிரம் செலவு செய்தோம்.

திருமணத்திற்குப் பிறகு, எனது நகைகள், பணம் மற்றும் பொருட்களை டிங்குவின் தாயார் அஞ்சனா தேவி வாங்கி வைத்துக்கொண்டார். டிங்குவின் சகோதரி சோனியா போசுவின் திருமணத்திற்கு எனது பெற்றோரிடம் இருந்து ஒரு லட்சம் ரூபாய் வாங்கிக்கொடுத்தேன். அதன்பிறகும் என்னிடம் வரதட்சணை கேட்டு தொந்தரவு செய்தனர். டிங்குவும், அவரது தாய் மற்றும் சகோதரியுடன் சேர்ந்து கொண்டு கார் வாங்கி வரும்படி என்னைக் கட்டாயப்படுத்தினார்.

இதற்கு நான் மறுத்ததால் என்னுடன் பேசுவதை நிறுத்திக்கொண்ட டிங்கு, வீட்டிற்குத் தாமதமாக வரத்தொடங்கினார். சில நாட்கள் வீட்டிற்கே வராமலும் இருந்தார். வேறு வழியில்லாமல் தனிக்குடித்தனம் சென்றுவிட்டேன். அதன்பிறகும் தனக்கு கார் வாங்கித்தராவிட்டால், 2-வது திருமணம் செய்து கொள்வேன் என்றும், என்னிடம் இருந்து விவாகரத்து பெற்றுவிடுவேன் என்றும் டிங்கு என்னை மிரட்டினார்.

இதற்கிடையே என் கணவரைப் பற்றி விசாரித்தபோது, டி.வி. நடிகை கவிதாவை டிங்கு திருமணம் செய்து கொண்டுவிட்டதாக தெரியவந்தது. வரதட்சணை கேட்டு கொடுமைப்படுத்தியதற்காகவும், 2-வது திருமணம் செய்து கொண்டதற்காகவும் என் கணவர் டிங்கு, அவருக்கு உடந்தையாக இருந்த அவரது தாயார், தங்கை ஆகியோர் மீது சட்டப்படி நடவடிக்கை எடுக்க வேண்டும்."

இவ்வாறு டிங்குவின் மனைவி கொடுத்த புகார் மனுவில் கூறப்பட்டுள்ளது.

இந்த வழக்கில் தனக்கு முன்ஜாமீன் வழங்க வேண்டும் என்று கோரி டிங்கு சென்னை செசன்சு நீதிமன்றத்தில் மனு தாக்கல் செய்தார். மனுவை விசாரித்த நீதிபதி தேவதாஸ், இது குடும்பப் பிரச்சனையாக உள்ளதால் இருவரும் குடும்ப நல ஆலோசனை மையத்தை அணுகும்படி அறிவுறுத்தியதோடு வழக்கை வரும் 20 ஆம் தேதிக்கு ஒத்திவைத்தார்.