இலங்கையில் தினமும் 40 பேர் பக்கவாத நோயினால் இறப்பு

by **நண்பன்** Mon 3 Oct 2011 - 11:06

இலங்கையில்
தினந்தோறும் 40 பேர் பக்கவாத நோயினால் உயிரிழப்பதாக சுகாதார அமைச்சின்
செயலாளர் வைத்தியர் பாலித்த மஹிபால தெரிவித்தார். ஆறு செக்கன்களுக்கு ஒரு
தடவை உலகின் எந்த மூலையிலாவது ஒருவர் பக்க வாதத்தினால் உயிரிழப்பதுடன்
எம்மில் ஆறு பேரில் ஒருவர் தமது ஏதாவது ஒரு வயதில் பக்கவாதத்திற்கு
ஆளாகுவரென ஆய்வுகள் தெரிவிப்பதாகவும் அவர் கூறினார்.

தேசிய பக்கவாத அமைப்பின் ஏற்பாட்டில் 2011 இதற்கான ஆசிய பசுபிக் பக்கவாத
மாநாடு கடந்த மூன்று தினங்களாக கொழும்பு சினமன் கிரேன்ட் ஹோட்டலில்
நடைபெற்றது. இதில் கலந்துகொள்வதற்காக 32 நாடுகளைச்சேர்ந்த 400 பிரதிநிதிகள்
இலங்கைக்கு வருகை தந்திருந்தனர். இது தொடர்பாக விளக்கமளிக்கும்
செய்தியாளர் மாநாட்டிலேயே அமைச்சின் செயலாளர் மேற்கண்டவாறு தெரிவித்தார்.

பக்கவாத நோய் வயதானவர்களுக்கு மட்டுமே உரியது என்பதற்கில்லை. 15 வயது
தொடக்கம் 59 வயதிற்குட்பட்ட எவரையும் இந்நோய் பாதிக்கலாம். பேச்சில்
தடுமாற்றம், பார்வை குறைதல், தீராத தலைவலி, காது சரிவர கேளாமை இது போன்ற
எத்தகைய அறிகுறிகள் தென்பட்டாலும் உடனடியாக அருகிலிருக்கும் பெரிய
வைத்தியசாலையொன்றில் அனுமதிக்குமாறும் அமைச்சின் செயலாளர்
கேட்டுக்கொண்டார்.

சரியான உணவுகளை உட்கொள்ளாமை, உடற் பயிற்சியின்மை, மது பாவனை, புகைத்தல்
ஆகியன காரணமாகவே பிரதானமாக பக்கவாத நோய் ஏற்படுவதாகவும் இச்செய்தியாளர்
மாநாட்டில் கருத்து தெரிவித்த தேசிய பக்கவாத அமைப்பின் தலைவர் வைத்தியர்
பத்மா குணரத்ன தெரிவித்தார். எதிர்வரும் 29 ஆம் திகதி உலக பக்க வாத
தினமாகும். அதனை முன்னிட்டே இந்த மூன்று நாள் மாநாட்டை இம்முறை இலங்கையில்
நடத்தியிருந்தோம்.

காய்கறிகள், பழவகைகள் என்பவற்றை அதிகளவு உண்பதுடன் சீனி, உப்பு என்பவற்றை
குறைத்து நுகர்வதன் மூலமும் சரியான உடற் பயிற்சியினை பின்பற்றுவதன் மூலமும்
இத்தகைய நோய் பாதிப்பு ஏற்படுவதனை தவிர்த்துக் கொள்ளலாமெனவும் வைத்தியர்
பத்மா குணவர்தன கூறினார்.

தொற்றா நோய் பிரிவுக்காக அரசாங்கம் வருடாந்தம் 300 மில்லியன் ரூபா நிதி
யினை ஒதுக்குகிறது. கொழும்பு தேசிய வைத்தியசாலையில் பக்கவாத சிகிச்சை
களுக்கென பாரிய பிரிவு ஒன்று ஸ்தாபிக் கப்பட்டிருப்பதுடன் மேலும் ஆறு
வைத்தியசாலைகளில் விரைவில் இதற்கான பிரிவு ஸ்தாபிக்கப்படவிருப்பதாகவும்
அவர் மேலும் குறிப்பிட்டார்.

பக்கவாத நோய்க்கான அறிகுறி, காரணம், விளைவு ஆகியனவற்றை நாம் அறிந்து
வைத்திருந்த போதிலும் அதனை எமது பிராந்தியத்தில் எவ்வாறு சரிவர
பிரயோகிப்பது மக்களிடையே எவ்வாறாக விழிப்புணர்வை ஏற்படுத்துவது என்பது
தொடர்பாக இம்மாநாட்டில் ஆராயப்பட்டதாகவும் அவர் குறிப்பிட்டார்.