மோசடிகளை தவிர்க்க 600 பொலிஸார் சேவையில்

கொரிய மொழி பரீட்சை 15,16,ம் திகதிகளில்

மோசடிகளை தவிர்க்க
600 பொலிஸார் சேவையில்






கொரிய மொழி பரீட்சைகள் நடைபெறும் எதிர்வரும் 15,16ம் திகதிகளில் மோசடி தவிர்ப்பு
நடவடிக்கைகளுக்கென 600 பொலிஸார் சேவையிலீடுபடுத்தப்படவுள்ளனர்.
கொழும்பில் 10 பரீட்சை மண்டபங்களில் நடைபெறவுள்ள இப்பரீட்சைக்கு சுமார் 51,000 பேர்
தோற்றுகின்றனர்.
பரீட்சை மண்டபத்தினுள் மோசடி வேலைகளுக்கென கையடக்க தொலைபேசிகள், இலத்திரனியல்
பொருட்கள் எடுத்துச் செல்வது தடை செய்யப்பட்டுள்ளது. இதனை மீறி எடுத்துச் செல்வோர்
சட்டத்தின் முன் நிறுத்தப்படுவார்கள் என பிரதி பொலிஸ் மா அதிபர் அநுர சேனாநாயக்க
தெரிவித்தார். பரீட்சை மோசடிகளில் ஈடுபடுவோர் பற்றிய விபரங்கள் அறிந்திருப்பின்
உடனடியாக பொலிஸாருக்கு தகவல் தெரிவிக்குமாறும் பிரதி பொலிஸ் மாஅதிபர் கேட்டுக்
கொண்டுள்ளார்.
எதிர்வரும் 15,16ம் திகதிகளில் நடைபெறவுள்ள மேற்படி பரீட்சைக்கான பாதுகாப்பு
ஏற்பாடுகள் குறித்து விசேட கூட்டமொன்று நேற்று இலங்கை வெளிநாட்டு வேலைவாய்ப்பு
பணியகத்தின் தலைவர் சட்டத்தரணி கிங்ஸ்லி ரணவக்க தலைமையில் நடைபெற்றது.
கொரிய மனித வள அபிவிருத்தி நிறுவனத்தினூடாக நடத்தப்படும் இப்பரீட்சையில் சித்தி
பெறுபவர்களுக்கு கொரிய வேலை வாய்ப்புகள் வழங்கப்படும்.
மோசடிகளை தடுப்பதற்கான ஒரு நடவடிக்கையாக தகவல்களை தருமாறும் பொது மக்களிடம் பொலிஸார்
கேட்டுக் கொண்டுள்ளனர்.
பிரதி பொலிஸ் மா அதிபர் அநுர சேனாநாயக்க (கொழும்பு பிரிவு) 011-2231428 அல்லது
மத்திய கொழும்பு சிரேஷ்ட பொலிஸ் அத்தியட்சகர் ஈ.பி.கே. மெகாதி பெரேரா 011-2433342
அல்லது அவசர அழைப்பு பிரிவு 011-2322322 அல்லது அநுர பிரேமரட்ண பணியகத்தின் விசேட
புலனாய்வுப் பிரிவு முகாமையாளர் 077-3140300 அல்லது விசேட புலனாய்வு பிரிவு (பணியகம்)
011-2864118 என்ற தொலைபேசி இலக்கங்களுடன் தொடர்பு கொண்டு தகவல்களை தந்துதவுமாறு
பணியகத்தின் தலைவர் கேட்டுக் கொண்டுள்ளார்.