ஜப்பானில் மீண்டும் நிலநடுக்கம்: கட்டிடங்கள் குலுங்கியதால் மக்கள் பீதி

ஜப்பானில் உள்ள புகுஷிமாவில் கடந்த மார்ச் 11-ந்தேதி சக்தி வாய்ந்த பூகம்பம் ஏற்பட்டது. அதை தொடர்ந்து சுனாமியும் ஏற்பட்டது. இதில், 20 ஆயிரம் பேர் உயிரிழந்தனர்.புகுஷிமாவில் உள்ள அணு உலை வெடித்து சிதறியது. அதில் இருந்து கதிர்வீச்சு வெளியேறியதால் அதை சுற்றி 20 கி.மீட்டர் சுற்றளவில் தங்கியிருந்தவர்கள் அங்கிருந்து அப்புறப்படுத்தப்பட்டனர். அதைத்தொடர்ந்து ஜப்பானில் தொடர்ந்து அடிக்கடி நிலநடுக்கங்கள் ஏற்பட்டன.

இந்த நிலையில் ஜப்பானில் புகுஷிமா பகுதியில் இன்று காலை 11.45 மணியளவில் மீண்டும் நிலநடுக்கம் ஏற்பட்டது.இதனால் வீடுகள் மற்றும் கட்டிடங்கள் குலுங்கின. எனவே, பீதி அடைந்த மக்கள் வீடுகளை விட்டு வெளியேறி ஓட்டம் பிடித்தனர்.

இதற்கிடையே புகுஷிமா பகுதியில் 5.5.ரிக்டர் அளவில் நிலநடுக்கம் பதிவானதாக அமெரிக்க புவியியல் ஆய்வு மையம் அறிவித்துள்ளது. நிலநடுக்கத்தை தொடர்ந்து சுனாமி ஏற்படலாம் என்ற அச்சத்தில் பொதுமக்கள் இருந்தனர். ஆனால் சுனாமி எச்சரிக்கை எதுவும் விடப்படவில்லை.

கடந்த மார்ச் மாதம் ஏற்பட்ட பூகம்பத்தில் புகுஷிமா அணுஉலை வெடித்து சிதறியது. ஆனால் இன்று ஏற்பட்ட நிலநடுக்கத்தில் அணுஉலைக்கு பாதிப்பு எதுவும் இல்லை என அறிவிக்கப்பட்டுள்ளது. நிலநடுக்கம் டோக்கியோவிலும் உணரப்பட்டதாக பொதுமக்கள் தெரிவித்தனர்.