தாஜ்மகாலுக்கு ஆபத்து இல்லை: தொல்பொருள் ஆய்வு துறை விளக்கம்

by *சம்ஸ் Tue 11 Oct 2011 - 6:26

சமீபத்தில் இங்கிலாந்து பத்திரிகையில் வெளியான கட்டுரையில் தாஜ்மகாலில் வெடிப்பு ஏற்பட்டு ஆபத்தான நிலையில் இருக்கிறது. இன்னும் 5 ஆண்டுகளில் தாஜ்மகால் இடிந்துவிடும் என்று குறிப்பிடப்பட்டு இருந்தது. பாரதீய ஜனதா கட்சியின் உள்ளூர் எம்.பி. ராம்சங்கர் கதேரியா மற்றும் வரலாற்று ஆய்வாளர் ஒருவரை மேற்கொள் காட்டி, அந்த பத்திரிகை செய்தி வெளியிட்டு இருந்தது.

இது உலக அதிசயங்களின் ஆர்வலர்களுக்கு அதிர்ச்சியை அளித்தது. இங்கிலாந்து பத்திரிகையில் வந்த செய்திக்கு இந்திய தொல்பொருள் ஆய்வு துறை மறுப்பு தெரிவித்துள்ளது. இதுபற்றி இந்த துறை அதிகாரிகள் கூறியதாவது:-

தாஜ்மகாலுக்கு எந்த ஆபத்தும் இல்லை. நாங்கள் நேரில் சென்று ஆய்வு நடத்தினோம். தாஜ்மகாலில் எங்கும் எந்த விரிசலும் ஏற்படவில்லை. சுவரில் பதிக்கப்பட்டுள்ள மரங்கள் உளுத்துப்போகவில்லை. சேதம் எதுவும் இன்றி பலமாக உள்ளன. தாஜ்மகால் யமுனை நதியின் கரையில் அமைந்துள்ளது. தற்போது அந்த நதி வறண்டு வருகிறது. இதனால் அச்சம் அடைந்த சிலர், தாஜ்மகாலுக்கு ஆபத்து என்று வதந்தியை கிளப்பி விட்டுள்ளனர்.

இவ்வாறு அவர்கள் கூறினார்கள்.

இதுபற்றி பாரதீய ஜனதா எம்.பி. ராம்சங்கர் கதேரியா கூறியதாவது:-

யமுனை நதி வறண்டுவிட்டது. இதனால் தாஜ்மகாலுக்கு ஆபத்து ஏற்படலாம் என்ற எனது அச்சத்தையும், கவலையையும் தெரிவித்தேன். தாஜ்மகால் நல்ல நிலையில் இருக்க வேண்டுமானால், நதியில் தண்ணீர் இருப்பது அவசியம். தாஜ்மகால் 5 ஆண்டுகளில் இடிந்து விழுந்துவிடும் என்று காலவரையறை எதையும் நான் குறிப்பிடவில்லை. ஆபத்து இருக்கிறது என்று மட்டுமே கூறினேன். இதுபற்றி பலர் என்னிடம் போனில் கேட்டனர். அவர்களுக்கு நான் தெளிவாக விளக்கிவிட்டேன். வரலாற்று ஆராய்ச்சியாளர்கள் பலரும் இதே கருத்தைதான் வெளியிட்டுள்ளனர்.

இவ்வாறு அவர் கூறினார்.