ரோபோ மூலம் இதயத்தில் ஒரே நேரத்தில் 2 சத்திரசிகிச்சை

by *சம்ஸ் Thu 13 Oct 2011 - 6:22

ரோபோ மூலம் இதயத்தில் ஒரே நேரத்தில் 2 சத்திரசிகிச்சை
சென்னை:
ஈராக் நாட்டைச் சேர்ந்தவருக்கு, சென்னை செட்டிநாடு மருத்துவமனையில், ரோபோ மூலம், இதய வால்வு அறுவை சிகிச்சையும், இதயத்தில் அடைத்துப் போன இரத்தக் குழாய்க்கு, மாற்று இரத்தக் குழாய் பொருத்தும் சிகிச்சையும், ஒரே நேரத்தில் செய்யப்பட்டன.

இதுகுறித்து, செட்டி நாடு மருத்துவமனை இதய அறுவை சிகிச்சை நிபுணர் ரவிகுமார் கூறியதாவது; ஈராக் நாட்டைச் சேர்ந்த அலிமல்பார் (65) கடும் நெஞ்சு வலியால், பல ஆண்டுகளாக அவதிப்பட்டு வந்தார். அவரைப் பரிசோதித்த டாக்டர்கள், அவருக்கு இதய மைட்ரல் வால்வு பாதிக்கப்பட்டிருப்பதை அறிந்தனர்.

சிகிச்சைக்காக அவர், செட்டிநாடு மருத்துவமனைக்கு வந்தார். அவருக்கு மைட்ரல் வால்வு பிரச்சினையோடு இரத்தக்குழாயில் அடைப்பு இருப்பது கண்டுபிடிக்கப்பட்டது. இதய வால்வுகளை மாற்றுவதோடு, இதய இரத்தக் குழாயில் ஏற்பட்டுள்ள அடைப்புக்கு, மாற்று இரத்தக் குழாய் பொருத்தும் பைபாஸ் அறுவை சிகிச்சை செய்யவும் முடிவு செய்யப்பட்டது. ரோபோ மூலம் இரண்டு அறுவை சிகிச்சைகளையும் ஒரே நேரத்தில் செய்வது, நோயாளிக்கு சிரமத்தைக் குறைக்கும் எனக் கருதி செப், 21ம் திகதி ரோபோ மூலம் அறுவை சிகிச்சை செய்யப்பட்டது. ஒரே நேரத்தில் வால்வுகளை மாற்றி, பைபாஸ் அறுவை சிகிச்சை செய்வது, உலகில் இதுவே முதல் முறை.

மார்பில் 4 முதல் 6 செ.மீ. வரை சிறிய துளையிட்டு ரோபோ மூலம் அறுவை சிகிச்சை செய்வதால், பெரிய அளவில் காயம் ஏற்படாது.

நோயாளி, விரைவில் இயல்பு வாழ்க்கைக்கு திரும்ப முடியும். அறுவை சிகிச்சையின் போது, குறைந்த அளவே இரத்தம் வெளியேறும். வலி குறையும், விரைவில் அன்றாட வேலைகளைச் செய்ய முடியும். அறுவை சிகிச்சை முடிந்த, 5 நாட்களில் வீடு திரும்பலாம். இந்த ரோபோ, பல கோடி ரூபாய் மதிப்புள்ளது. இலாப நோக்கத்தோடு அல்லாமல், மக்களின் நலன் கருதி, செட்டிநாடு மருத்துவமனையில், ரோபோ அறுவை சிகிச்சை வசதிகள் செய்யப்பட்டுள்ளன.