இஸ்ரேல் இராணுவ வீரரை மீட்க 1,027 பலஸ்தீன கைதிகள் விடுதலை

இஸ்ரேல் இராணுவ வீரரை மீட்க 1,027 பலஸ்தீன கைதிகள் விடுதலை
இஸ்ரேல் தனது இராணுவ வீரர் ஒருவருக்காக 1,027 பலஸ்தீன சிறைக் கைதிகளை விடுவிக்க முன்வந்துள்ளது. இது குறித்து இஸ்ரேல் அரசுக்கும் காசாவை ஆளும் ஹமாஸ் அமைப்புக்கும் இடையில் இணக்கம் ஏற்பட்டுள்ளது.

கடந்த 5 ஆண்டுகளாக ஹமாஸ் அமைப்பிடம் கைதாகியுள்ள இஸ்ரேல் இராணுவ வீரர் கிலாட் ஷலிட்டுக்கு பகரமாகவே ஆயிரத்திற்கும் மேற்பட்ட பலஸ்தீன கைதிகளை விடுவிக்க இஸ்ரேல் ஒப்புக் கொண்டுள்ளது.

இது தமது தேசம் பெற்றுள்ள மிகப்பெரிய வெற்றி என்றும் இதனையிட்டு பெருமைப்பட வேண்டும் எனவும் ஹமாஸ் அமைப்பின் தலைவர் காலித் மிஷால் குறிப்பிட்டுள்ளார். கடந்த செவ்வாய்க்கிழமை இரு தரப்புக்கும் இடையில் ஏற்பட்ட இணக்கப்பாட்டுக்கு அமைய இஸ்ரேல் வீரர் ஷலித்துக்கு பகரமாக 1,027 பலஸ்தீனர்களை விடுவிக்க இஸ்ரேல் ஒப்புக் கொண்டுள்ளது என சிரியா சென்றுள்ள மிஷால் தெரிவித்துள்ளார்.

எனினும் பல நெருக்கடிக்கு மத்தியில் எடுக்கப்பட்ட கடினமான தீர்மானம் என இஸ்ரேல் பிரதமர் பென்ஜமின் நெதன்யாகு தெரிவித்துள்ளார். இது குறித்து அவர் இஸ்ரேல் தேசிய தொலைக் காட்சியில் உரையாற்றும் போது, நாம் கிலாட் ஷலிட்டை விடுவிக்க ஹமாஸ் அமைப்புடன் இணக்கத்திற்கு வந்துள்ளோம். இதன்படி எமது மகன் விரைவில் நாடு திரும்புவான் என்றார்.

ஹமாஸ் அமைப்புடனான கைதிகள் பரிமாற்றம் குறித்த ஒப்பந்தம் தொடர்பில் இஸ்ரேல் அமைச்சரவையில் நேற்று முன்தினம் இடம்பெற்ற அவசர வாக்கெடுப்பில் ஆதரவாக 26 வாக்குகள் கிடைத்ததோடு எதிராக 3 வாக்குகள் மாத்திரமே பதிவானது.

இதன்படி இஸ்ரேல் இராணுவ வீரர் கிலாட் ஷலிட் ஹமாஸ் அமைப்பினால் விரைவில் விடுவிக்கப்படவுள்ளார். இதற்கு பகரமாக இஸ்ரேல் சிறையில் உள்ள 1,027 பலஸ்தீன கைதிகளும் இரண்டு கட்டமாக இஸ்ரேல் அரசு விடுவிக்கவுள்ளது. முதல் கட்டத்தில் 450 கைதிகள் ஒரு வாரத்திற்குள் விடுவிக்கப்படவுள்ளனர். தொடர்ந்து மேலும் 550 கைதிகளும் இரு மாத காலத்திற்குள் விடுவிக்கப்படவுள்ளனர்.

இவ்வாறு விடுவிக்கப்படும் கைதிகளில் 27 பெண்கள் உள்ளடங்குவதோடு ஆயுள் தண்டனைக்கு உள்ளான 315 கைதிகளில் 20 ஆண்டுகளுக்கு மேல் சிறை அனுபவிக்கு கைதிகளுக்கு முன்னுரிமை வழங்கப்படவுள்ளது.

எனினும் முக்கிய கைதிகள் இந்த ஒப்பந்தத்தில் விடுவிக்கப்படமாட்டாது என இஸ்ரேல் உளவுத்துறை குறிப்பிட்டுள்ளது. குறிப்பாக பத்தா அமைப்பின் முக்கிய தலைவர் மர்வான் பகவுடி, 2001ம் ஆண்டு இஸ்ரேல் சுற்றுலாத் துறை அமைச்சரை கொலை செய்தது தொடர்பில் கைதான அஹமட் சதாத் மற்றும் ஹமாஸ் அமைப்பின் அப்துல் பகவ்தி ஆகியோர் விடுவிக்கப்படமாட்டார்கள் என இஸ்ரேல் உளவுத்துறை குறிப்பிட்டுள்ளது.

இஸ்ரேல் சிறையில் சுமார் 5000க்கும் மேற்பட்ட பலஸ்தீனர்கள் உள்ளனர். இதில் பலரும் எந்த குற்றச்சாட்டும் இல்லாமல் சிறைவாசம் அனுபவித்து வருகின்றமை குறிப்பிடத்தக்கது.

இந்நிலையில் இந்த இணக்கப்பாடு ஏற்பட்டதைத் தொடர்ந்து காசா பகுதியிலுள்ள மக்கள் ஒன்று திரண்டு தனது மகிழ்ச்சியை வெளிப்படுத்தினர். நேற்று முன்தினம் காசா வீதிகளில் திரண்ட ஆயிரக்கணக்கான மக்கள் இதனைக் கொண்டாடினர்.

இந்த கைதிகள் பரிமாற்ற ஒப்பந்தம் கைச்சாத்தாவதற்கு எகிப்து அரசு முக்கிய பங்கு வகித்துள்ளது. இது குறித்து இஸ்ரேல் அரசு மற்றும் ஹமாஸ் அமைப்பு எகிப்து அரசுக்கும் பாதுகாப்புத் தரப்பினருக்கும் நன்றியை தெரிவித்துக் கொண்டன. 25 வயதான இஸ்ரேல் இராணுவ வீரர் கிலாட் ஷலிட் கடந்த 2006ம் ஆண்டு காசா பகுதிக்குள் ஊடுருவியதைத் தொடர் ந்து ஹமாஸ் அமைப்பினால் கைது செய்யப்பட்டார். கடந்த 5 ஆண்டுகளாக அவரை விடுவிக்க இஸ்ரேல் அரசு மேற் கொண்ட பல முயற்சிகளும் தோல்வி அடைந்த நிலையிலேயே இந்த இணக்கப்பாடு எட்டப்பட்டுள்ளது.