அன்னா ஹசாரே மவுனவிரதம்

by **நேசமுடன் ஹாசிம்** Sun 16 Oct 2011 - 12:12

மன அமைதிக்காக, ஒரு வாரத்துக்கு அன்னா ஹசாரே மவுனவிரதம் இருக்கப் போவதாக, அவரது குழுவினர் தெரிவித்துள்ளனர். அன்னா ஹசாரேயின், ஊழலுக்கு எதிரான அமைப்பைச் சேர்ந்த ஷ்யாம் ஆஷவா கூறியதாவது:
ஊழலுக்கு எதிராக, கடந்த ஆகஸ்டில், டில்லியில் 12 நாட்கள் உண்ணாவிரதம் இருந்தார், அன்னா ஹசாரே. பின்னர், ஒரு சில நாட்கள் மருத்துவமனையில் சிகிச்சை பெற்றார். இதையடுத்து, பத்திரிகையாளர்கள், சமூக ஆர்வலர்கள், பிரபலங்களுடன், தொடர்ந்து ஆலோசனை, கலந்துரையாடல் என, மிகவும் "பிசி'யாக இருந்தார். இதனால், மன உளைச்சலுக்கு ஆளாகியுள்ளார். எனவே, மன அமைதி பெறுவதற்காக, நாளை (அக்., 17) துவங்கி, ஒரு வாரம் வரை, மவுனவிரதம் மேற்கொள்ள, அவர் முடிவு செய்துள்ளார். இவ்வாறு ஷ்யாம் கூறினார். இதற்கிடையே, "கடந்த 1998ல் காஷ்மீரில் உள்ள என் வீட்டுக்கு வந்த ஹசாரே, மனித உரிமை மீறல் தொடர்பாகவும், மக்களுக்கான அரசியல் உரிமை பற்றியும், என்னிடம் பேசினார். இந்நிலையில் தற்போது, காஷ்மீர், இந்தியாவின் ஒரு அங்கம் என, அவர் பேசியிருப்பது ஆச்சரியம் அளிக்கிறது' என, ஜம்மு காஷ்மீர் விடுதலை முன்னணி அமைப்பின் தலைவர் யாசின் மாலிக் கூறியுள்ளார்.