குழந்தைகள் நம் கையில்...

குழந்தைகள் பள்ளிக்கு சென்று பாடங்களை மட்டும் கற்றுக் கொண்டால் போதாது. அது நல்ல பழக்க வழக்கங்களையும் கற்றுக் கொள்ள வேண்டும். அந்த பழக்க வழக்கங்களை கற்று கொடுப்பது பெற்றோரின் கடமை ஆகும். நம்முடைய பழக்க வழக்கங்கள் தான் குழந்தைகளும் பின்பற்றும். நம்முடைய ஒவ்வொரு செயலையும் அவர்கள் பார்த்துக் கொண்டுதான் இருக்கிறார்கள். காலையில் நாம் டூத்பேஸ்டுடன் எழுந்து பல் துலக்கி முகம் கழுவி மற்ற செயல்களில் ஈடுபட்டோம் என்றால் குழந்தைகளும் அவ்வாறு செய்து பழக்கபடுத்தி கொள்கிறார்கள். மேலும் காலையில் குளித்து முடித்து சுத்தமான உடைகளை அணிந்து சாமி கும்பிட்டு காலை உணவை உண்டோம் என்றால் அவர்களும் நம்மைப் போலவே கடைபிடிப்பார்கள்.

நாம் பெரியவர்களிடம் மரியாதையாக பேசி, மற்றவர்களிடம் அன்பாக பேசி பழகினால் அவர்களும் அதே முறைகளை பின்பற்றுகிறார்கள். நம்முடைய வீட்டிற்கு வருபவர்களிடத்தில் அவர்களுக்கு மரியாதையும், அவர்களை சிறந்த உபசரிப்பும் செய்து அவர்களை நாம் நன்றாக பார்த்துக்கொண்டோம் என்றால் குழந்தையும் அம்முறைகளை அப்படியே பின்பற்றுவார்கள். ஆகவே குழந்தைகள் பள்ளிக்கூடம் சென்று தான் நல்ல பழக்க வழக்கத்தையும், மரியாதையும் கற்றுக் கொள்ள வேண்டும் என்பதில்லை. அவர்கள் குழந்தையாக இருக்கும் போதே நாம் கற்றுத்தரும் பாடமே சிறந்த கல்வியாகும்.

இதை முறையாக பின்பற்றினால் பள்ளிக்கூடம் செல்லும் போது அங்குள்ள பழக்க வழக்கங்களையும் கற்று நல்ல பிள்ளையாக, ஒழுக்கமான பிள்ளையாக வளர்ந்து தானும் உயர்ந்து பெற்றோர்களுக்கும் சமுதாயத்தில் நல்ல மதிப்பை பெற்று தருவார்கள். ஆகவே குழந்தைகளை நல்ல குழந்தையாக வளர்ப்பது பெற்றோர்களின் கையில் தான் இருக்கிறது.