உள்ளாட்சியில் பெண்கள் சுயமாக இயங்க முடியுமா?

உள்ளாட்சியில் பதவிக்கு வந்துள்ள பெண்கள், ஆண்கள் துணையின்றி சுயமாக இயங்க, அரசு நடவடிக்கை எடுக்க வேண்டுமென, பொதுமக்கள் எதிர்பார்க்கின்றனர். உள்ளாட்சியில் பெண்களுக்கு, 33 சதவீதம் இட ஒதுக்கீடு செய்யப்பட்டுள்ளது. மேயர், மாநகராட்சி உறுப்பினர்கள், நகராட்சி தலைவர், கவுன்சிலர்கள், மாவட்ட ஊராட்சி தலைவர்கள், மாவட்ட கவுன்சிலர்கள், ஒன்றிய தலைவர், ஒன்றிய கவுன்சிலர்கள், ஊராட்சி தலைவர்கள் என அனைத்து பதவிகளிலும், பெண்கள் 33 சதவீத இட ஒதுக்கீட்டில் வெற்றிப் பெற்றுள்ளனர்.

இதுவரை வெற்றி பெற்ற பெண்களில், 99 சதவீதம் பேர், தந்தை, கணவன், சகோதரன் அல்லது உறவினர் ஒருவர் என, யாராவது ஒருவர் துணையுடன் செயல்பட்டுள்ளனர். தலைவர் பதவியில் உள்ளவர்களின் ஆண் துணையாக உள்ளவர்களே, மன்றத்தை நடத்தும் பணியையும் செய்வது உண்டு. எனவே, இனியாவது பெண்கள் சுயமாக செயல்பட அரசு நடவடிக்கை எடுக்க வேண்டும்.

குறைந்தது ஒவ்வொரு உள்ளாட்சியிலும், மாதம் ஒரு முறையாவது, மன்ற கூட்டம் நடக்கும். இந்த மன்றத்தை பெண்கள் நடத்தினால், அவர்களுக்கு தன்னம்பிக்கையும், மன தைரியமும், நிர்வாக அனுபவமும் கிடைக்கும்.
தமிழகத்தில், 10 மேயரில் ஆறு பேர், பெண்கள். இவர்கள் சிறப்பாக செயல்பட, பதவி குறித்த அறிவும், துடிப்பும் தேவை. முழு முயற்சி எடுத்து, தங்கள் பணிகளை செம்மையாக நிறைவேற்றுமாறு, முதல்வர் ஜெயலலிதா அவர்களை அறிவுறுத்த வேண்டும் என, மேயரை தேர்ந்தெடுத்த மக்கள் எதிர்பார்க்கின்றனர்.