தலைவரின் டில்லி பயணம், கட்சிக்கும், கருணாநிதிக்கும் கெட்ட பெயரைத் தான் தந்துள்ளது

சோகத்தை வெளிக்காட்ட முடியாத தர்மசங்கடத்தில் இருக்கிறது தி.மு.க., தலைமை. தீபாவளிக்கு திகார் சிறையிலேயே கனிமொழி இருக்க நேர்ந்தாலும், நவ., 3ம் தேதி அவருக்கு ஜாமின் கிடைத்துவிடும் என்ற நம்பிக்கை அவர்கள் மத்தியில் காணப்படுகிறது.
அதேசமயம், இவ்விவகாரத்தில், தலைமை மீது தொண்டர்கள் கடும் அதிருப்தியில் இருப்பதாக அதிர்ச்சி தகவல் வெளியாகியுள்ளது.




பாட்டியாலா விசாரணை நீதிமன்றத்தில் நேற்று, எதிர்பார்த்தபடியே கனிமொழியின் ஜாமின் மனுவை, சி.பி.ஐ., ஆட்சேபிக்கவில்லை. இருப்பினும் நீதிபதி, மனு மீதான உத்தரவை, நவ., 3ம் தேதி வரை ஒத்தி வைத்துவிட்டார். சி.பி.ஐ.,யின் எதிர்ப்பு இல்லாததால் ஆறுதல் அடைந்த தி.மு.க., தலைமை, தீபாவளிக்கும் திகார் சிறையிலேயே கனிமொழி இருக்க நேர்ந்ததை எண்ணி, சோகத்தில் ஆழ்ந்துள்ளது.

காங்., தலைவர் சோனியா, பிரதமர் மன்மோகன் சிங் ஆகியோரை, அவர் நேற்று முன்தினம் சந்தித்ததற்கும், சி.பி.ஐ.,யின் இந்த நிலைப்பாட்டுக்கும் நெருங்கிய தொடர்பு இருப்பதாக அரசியல் நோக்கர்கள் கருதுகின்றனர்.

கருணாநிதி இன்று வருகை : இதுகுறித்து, பெயர் வெளியிட விரும்பாத தி.மு.க., பிரமுகர் ஒருவர் கூறியதாவது:
தலைவரைப் பொறுத்தவரை இந்த விவகாரத்தில், மிகுந்த வேதனையடைந்துள்ளார். திங்கள் கிழமை சென்னை திரும்பும்போது, மகளுடன் வீடு வந்துவிடலாம் என்று தான் நினைத்திருந்தார். அது கைகூடாமல் போனதில் அவருக்கு கவலை தான். மற்றபடி, தீபாவளியை கோலாகலமாகக் கொண்டாடுபவர் அல்ல என்பதால், அது பற்றிய வருத்தமெல்லாம் இல்லை. பேரன் ஆதித்யாவை நினைத்து தான் அவர் வேதனைப்பட்டார். நேற்று எப்படியும் ஜாமின் கிடைத்துவிடும் என மிகுந்த நம்பிக்கையில் இருந்தார். அதனால் தான், விசாரணை தள்ளிப் போகப் போக, நேற்று காலை 10.30, மாலை 3 மணி, இரவு என, மூன்று முறை அவரது சென்னை பயணம் ஒத்திவைக்கப்பட்டது. இறுதியாக, இன்று தான் டில்லியில் இருந்து திரும்புவது என முடிவாகியுள்ளது. இவ்வாறு அந்த தி.மு.க., பிரமுகர் கூறினார்.

கட்சியினர் கடும் அதிருப்தி : தி.மு.க., தலைவர் கருணாநிதியும், அவரது குடும்பமும் மிகுந்த வேதனையில் இருந்தாலும், அவரது டில்லி பயணம் பற்றி, அக்கட்சித் தொண்டர்கள் கடும் அதிருப்தியில் உள்ளது அம்பலமாகியுள்ளது. "கனிமொழியின் ஜாமின் மனு பற்றி, பிரதமர் மற்றும் சோனியாவிடம் பேசவில்லை' என கட்சித் தலைமை திரும்பத் திரும்ப கூறி வந்தாலும், "இப்படி ஓர் அவப்பெயர் வந்ததற்கு தலைவரின் டில்லி பயணம்' அமைந்து விட்டதோ என, கட்சியினர் கருதுகின்றனர். மேலும், "காங்கிரசால் தான் தி.மு.க.,வுக்கு இத்தனை சிக்கலும்' என்ற எண்ணம் தொண்டர்களிடம் நிலவுகையில், மீண்டும் மீண்டும் அவர்களையே அண்டிப் பிழைக்கும் நிலைமையை அவர்கள் ரசிக்கவில்லை. "ஜாமின் கிடைத்த மறுநிமிடமே, கனிமொழி வெளியில் வந்துவிடப் போவதில்லை. நீதிமன்ற உத்தரவு உறுதியான பிறகு கூட கருணாநிதி, டில்லி சென்று மகளை அழைத்து வந்திருக்கலாம். தலைவரின் இந்தப் பயணம், கட்சிக்கும், கருணாநிதிக்கும் கெட்ட பெயரைத் தான் தந்துள்ளது' என்பது, அவர்களின் ஒட்டுமொத்த கருத்தாக இருக்கிறது.