கனிமொழி ஜாமீன் தள்ளி வைப்பு: கருணாநிதி சென்னை திரும்பினார்

ஸ்பெக்ட்ரம் வழக்கில் முன்னாள் மத்திய மந்திரி ஆ.ராசா, கனிமொழி
எம்.பி., சரத்குமார் உள்பட 17 பேர் கைது செய்யப்பட்டனர். திகார் ஜெயிலில்
இருக்கும் அவர்களது ஜாமீன் மனுக்கள் பலமுறை நிராகரிக்கப்பட்டது. இறுதியாக
சுப்ரீம் கோர்ட்டில் ஜாமீன் மனுதாக்கல் செய்தனர். அங்கும் ஜாமீன் மனு
நிராகரிக்கப்பட்டது. குற்றச்சாட்டு பதிவு செய்யப்பட்ட பின்பு சி.பி.ஐ.
கோர்ட்டில் ஜாமீன் மனுதாக்கல் செய்யுமாறு சுப்ரீம் கோர்ட்டு கூறியது.

கடந்த
22-ந் தேதி சி.பி.ஐ. கோர்ட்டில் ஆ.ராசா, கனிமொழி உள்பட 17 பேர் மீதும்
குற்றச்சாட்டு பதிவு செய்யப்பட்டது. இதையடுத்து கனிமொழி, சரத்குமார்
ஆகியோர் சி.பி.ஐ. கோர்ட்டில் நேற்று மீண்டும் ஜாமீன் மனு தாக்கல் செய்தனர்.
நீதிபதி ஓ.பி.சைனி முன்னிலையில் மனுக்கள் விசாரணைக்கு வந்தது.

இதேபோல்
குசேகான் நிறுவன இயக்குனர்கள் ஆசிப் பல்வா, ராஜீவ் அகல்வால், பட அதிபர்
கரீம் மொரானி ஆகியோர் தாக்கல் செய்த ஜாமீன் மனுவும் நேற்று விசாரணைக்கு
எடுத்துக் கொள்ளப்பட்டது. இந்த 5 பேருக்கு ஜாமீன் வழங்குவதற்கு சி.பி.ஐ.
தரப்பில் எதிர்ப்பு தெரிவிக்கப்படவில்லை.

இவர்கள்
மீதான குற்றச்சாட்டு நிரூபிக்கப்பட்டால் 5 ஆண்டுகள் வரை தான் சிறை தண்டனை
கொடுக்க முடியும் என்பதால் கனிமொழி உள்பட 5 பேரையும் ஜாமீனில் விட ஆட்சேபனை
இல்லை என்றும் மற்றவர்களது ஜாமீன் மனுக்களை எதிர்க்கிறோம் என்று சி.பி.ஐ.
வக்கீல் யு.யு. லலித் தெரிவித்தார்.

வக்கீலின்
வாதத்தை தொடர்ந்து கனிமொழி ஜாமீன் மனு மீது நவம் பர் 3-ந் தேதி தீர்ப்பு
வழங்கப்படும் என்று நீதிபதி அறிவித்தார். சி.பி.ஐ. எதிர்ப்பு
தெரிவிக்காததால் அன்று அவர்கள் ஜாமீனில் விடுதலையாகும் வாய்ப்பு உள்ளது.
நேற்றைய வழக்கு விசாரணையின் போது கனிமொழியின் தாயார் ராஜாத்தி அம்மாள்,
கணவர் அரவிந்தன், மகன் ஆதித்யா, டி.ஆர்.பாலு எம்.பி., ஆகியோர் கோர்ட்டுக்கு
வந்திருந்தனர்.

தி.மு.க. தலைவர் கருணாநிதி கடந்த
21-ந் தேதியே டெல்லிக்கு சென்றார். அங்கு காங்கிரஸ் தலைவர் சோனியா காந்தி,
பிரதமர் மன்மோகன்சிங் ஆகியோரை சந்தித்தார். பின்னர் திகார் ஜெயிலுக்குப்
போய் மகள் கனிமொழியைப் பார்த்து பேசினார். நேற்று கருணாநிதி சென்னை
திரும்புவதாக இருந்தார். ஆனால் கனிமொழி ஜாமீன் மனுவை சி.பி.ஐ.
எதிர்க்காததால் நேற்றே கனிமொழிக்கு ஜாமீன் கிடைத்து விடும் என்று
எதிர்பார்க்கப்பட்டது. இதனால் கனிமொழியை உடன் அழைத்து வரலாம் என்று
கருணாநிதி நேற்று டெல்லியில் தங்கி இருந்தார்.

ஜாமீன்
மனு தீர்ப்பு 3-ந் தேதிக்கு தள்ளி வைக்கப்பட்டதை தொடர்ந்து இன்று காலை
கருணாநிதி டெல்லியில் இருந்து புறப்பட்டார். மதியம் அவர் சென்னை
வந்தடைகிறார்.