ஜனாதிபதிக்கு எதிராக ஆஸியில் தாக்கல் செய்யப்பட்ட போர்க்குற்ற வழக்கு நிராகரிப்பு _

ஜனாதிபதி மஹிந்த ராஜபக்ஷவிற்கு எதிராக அவுஸ்திரேலிய மெல்பேர்ன் நகரில் தாக்கல் செய்யப்பட்ட போர்க்குற்ற வழக்கை அவுஸ்திரேலியாவின் சட்ட மா அதிபர் நிராகரித்துள்ளார்.

இதன்படி குறித்த வழக்கு விசாரணைக்கு எடுத்துக் கொள்ள முடியாதென நிராகரிக்கப்பட்டுள்ளது.

இலங்கையில் பிறந்த பொறியியலாளரான 63 வயதுடைய அருணாசலம் ஜெகதீஸ்வரன் இந்த வழக்கைத் தாக்கல் செய்திருந்தார்.

வடக்கில் இடம்பெற்ற யுத்தத்தின் போது பொதுமக்களின் வீடுகள், பாடசாலைகள், வைத்தியசாலைகள், ஆலயங்கள், சமூக நிலையங்கள் அனைத்தின் மீதும் இலங்கை வான், தரை, கடற்படை தாக்குதல் நடத்தி ஆயிரக்கணக்கான அப்பாவிப் பொதுமக்களை படுகொலை செய்ததாக தெரிவிக்கும் ஜெகதீஸ்வரன் தான் 2007 ஆம் ஆண்டிலிருந்து 2009 ஆம் ஆண்டு வரை வடக்கில் ஒரு தொண்டர் உத்தியோகத்தராக பணியாற்றிய போது அவற்றை நேரில் பார்த்ததாக தனது மனுவில் தெரிவித்துள்ளார்.

வன்னியில் இடம்பெற்ற இனப் படுகொலைகள் மற்றும் போர்க் குற்றங்களுக்கு தான் ஒரு கண்கண்ட சாட்சி என்றும் அவர் தெரிவித்துள்ளார். இலங்கை ஜனாதிபதி குற்றவாளியா சுற்றவாளியா என்பதை தீர்மானிக்க வேண்டும் என்றும் அவர் மனுவினூடாக நீதிமன்றத்தை கோரியுள்ளார்.

இந்த நிலையில் ஜனாதிபதிக்கு எதிராக வழக்குத் தொடர சட்டமா அதிபரின் அனுமதி தேவை என அவுஸ்திரேலிய பிரதமர் கூறியிருந்த நிலையில் வழக்குத் தொடர சட்டமா அதிபர் ரொபட் மிக்லேன் அனுமதி மறுத்துள்ளார்.

உள்நாட்டு சட்டம் மற்றும் சர்வதேச சட்டத்தின் கீழ் அவுஸ்திரேலியாவின் கடப்பாடுகளை மீறி வழக்குத் தாக்கல் செய்ய முடியாதென அறிவிக்கப்பட்டுள்ளது. இதேவேளை அவுதிஸ்திரேலிய அரசின் அனுமதியில்லாமல் இலங்கை ஜனாதிபதிக்கு எதிராக அவுஸ்திரேலிய நீதிமன்றத்தில் வழக்குத் தொடர முடியாது என்று அவுஸ்திரேலியப் பிரதமர் ஜுலியா கிலாட் தெரிவித்துள்ளார்.

மெல்பேர்ன் நீதிமன்றத்தில் இலங்கை ஜனாதிபதிக்கு எதிராக அருணாசலம் ஜெகதீஸ்வரன் என்பவர் தொடுத்துள்ள போர்க்குற்ற வழக்குத் தொடர்பாகவே அவர் இவ்வாறு கூறியுள்ளார்.

சட்டமா அதிபரின் ஆலோசனையின்றி இதுபோன்ற எந்தவொரு விவகாரம் குறித்தும் சட்ட நடவடிக்கை எடுக்க முடியாது என்று அவர் ஏபிசி வானொலிக்குத் தெரிவித்துள்ளார்.

இந்த விவகாரம் தொடர்பாக அவுஸ்திரேலிய சட்டமா அதிபருக்கு எந்தவொரு கோரிக்கையும் முன்வைக்கப்படவில்லை என்றும் அவர் குறிப்பிட்டுள்ளார்.

ஆனால் ஜெகதீஸ்வரனின் சட்டவாளர்கள் தாம் இது பற்றி அவுஸ்திரேலிய சட்டமா அதிபருக்கு எழுத்து மூலமான கோரிக்கை விடுத்துள்ளதாக கூறியுள்ளார்கள்.

அவுஸ்திரேலிய சட்டமா அதிபர் மக் கிளெல்லன்ட்டின் பேச்சாளர் இது தொடர்பான எந்தக் கோரிக்கையும் சட்டமா அதிபருக்கு அனுப்பப்படவில்லை என்று தெரிவித்துள்ளார்.

ஆனால் அவுஸ்திரேலிய சமஸ்டி காவல்துறைப் பேச்சாளர் தமக்கு இது பற்றிய கோரிக்கை விடுக்கப்பட்டுள்ளதாகவும் தாம் அது குறித்துப் பரிசீலனை செய்து வருவதாகவும் கூறியுள்ளார்.

அதேவேளை அனைத்துலக சட்டங்களின்படி தமது நாட்டுக்கு வருகை தரும் அரச தலைவர்களின் இராஜதந்திர சிறப்புரிமையைப் பாதுகாப்பதற்கான பொறுப்பு அவுஸ்திரேலிய அரசுக்கு உள்ளது என்றும் அவர் குறிப்பிட்டுள்ளார்.

தமது அரசாங்கம் போர்க்குற்றச்சாட்டுக்கள் தொடர்பான கரிசனைகளைத் தொடர்ந்து வெளிப்படுத்தி வருவதாகவும் அவுஸ்திரேலியப் பிரதமர் ஜுலியா கிலாட் ஏபிசி வானொலியிடம் தெரிவித்துள்ளார். _