சினிமா தயாரிப்பதற்காக மனைவியிடம் பணம் கேட்டு தொந்தரவு செய்த, கன்னட நடிகர்

சினிமா தயாரிப்பதற்காக மனைவியிடம் பணம் கேட்டு தொந்தரவு செய்த, கன்னட நடிகர் பிரசாந்த் மீது போலீஸில் புகார் பதிவு செய்யப்பட்டுள்ளது.
"ஒரதா ஐ லவ் யூ' என்ற கன்னட திரைப்படத்தில் நடித்தவர் நடிகர் பிரசாந்த். இவரது மனைவி சசிரேகா. இவர்கள் இருவரும் ஆதர்ஷா பிலிம் இன்ஸ்டிடியூட்டில் படித்து கொண்டிருந்த போதே, காதலித்து வந்தனர். சசிரேகா, கிளாஸிக்கல் நடன கலைஞராக இருந்து வந்தார். இவர்களுக்கு, 2004ல் திருமணம் நடந்து, ஒரு குழந்தையும் உள்ளது.

"வெங்கி', "மஹரிஷி', "அஞ்சதிரு' உட்பட பல திரைப்படங்களில் நடித்த பிரசாந்த், சொந்தமாக, "சிரயு' என்ற படத்தை தயாரிக்க முடிவு செய்தார். இதற்கான, பணத்தேவைக்கு பைனான்ஸியர்களை தேடி அலைந்தார். ஆனால், யாரும் கிடைக்காததால், மனைவி சசிரேகாவிடம், பணம் கேட்டு தொந்தரவு செய்துள்ளார். அவரது பெற்றோர் வீட்டுக்கு சென்று பணத்தை பெற்று வருமாறு அடிக்கடி துன்புறுத்தி வந்தார்.
இதை பொறுத்து கொள்ள முடியாத சசிரேகா, குடும்பநல நீதிமன்றத்தில் புகார் செய்துள்ளார். இது மட்டுமின்றி, பெங்களூரு ஹலசூரு கேட் பெண்கள் போலீஸ் நிலையத்திலும் புகார் செய்தார். புகாரில், தனது கணவர், விவகாரத்து பத்திரத்தில் கையெழுத்திடுமாறு வற்புறுத்து வருவதாக குறிப்பிட்டிருந்தார்.
இதற்கிடையில், டாலர்ஸ் காலனியில் பெண் ஒருவருடன் பிரசாந்த் குடும்பம் நடத்தி வருவதாக, சசிரேகாவுக்கு தெரிய வந்தது. அந்த பெண், பண வசதி படைத்தவர் என்றும், அவர் மூலம் சினிமா தயாரிப்பில் ஈடுபட திட்டமிட்டு அவருடன் பிரசாந்த் குடித்தனம் நடத்துவதாகவும் தகவலறிந்தார். இதனால், சஞ்சய் நகர் போலீஸ் நிலையத்தில் புகார் செய்தார்.
இதற்கிடையில், கடந்த 24ம் தேதி டாலர்ஸ் காலனி வீட்டுக்கு சென்ற சசிரேகா, அங்கிருந்த பிரசாந்தை பிடித்து இழுத்து, சஞ்சய் நகர் போலீஸில் ஒப்படைத்ததாகவும், போலீமார் வழக்கு பதிவு செய்வதாக கூறியதாகவும், ஆனால், அவர் போலீஸ் காம்பவுண்ட் சுவர் ஏறி தப்பிச்சென்றதாகவும் போலீஸ் தரப்பில் கூறப்பட்டது.
மற்றொரு தரப்பில், சசிரேகாவின் புகாரையடுத்து, டாலர்ஸ் காலனி வீட்டுக்கு சென்ற போலீசார், அங்கு பிரசாந்த் இல்லாததால், அவரை போலீஸ் நிலையத்திற்கு வருமாறு, அங்கிருந்தவர்களிடம் தெரிவித்ததாகவும், இதையடுத்து போலீஸ் நிலையத்திற்கு பிரசாந்த் வந்ததாகவும், போலீஸ் தரப்பில் மாறுபட்ட தகவல்கள் வெளியாகின. ஆனால், பிரசாந்த் போலீசிலிருந்து தப்பித்து சென்றதாக வெளியான தகவலை போலீசார் மறுத்தனர்.
சசிரேகா கூறியதாவது: கடந்த, 2004ம் ஆண்டு நானும், பிரசாந்தும் காதலித்து திருமணம் செய்து கொண்டோம். தற்போது எங்களுக்கு ஒரு மகன் உள்ளான். இந்நிலையில், என் கணவர், "கடந்த மூன்று மாதங்களாக எனக்கு வேறொரு பெண்ணுடன் தொடர்புள்ளது. அதனால், உனக்கு வேண்டிய ஜீவனாம்சம் கொடுக்கிறேன். விவகாரத்துக்கு ஒப்புக் கொள்' என, என்னை துன்புறுத்தினார், அடித்தும் வந்தார். ஆனால், நான் ஒப்புக் கொள்ளவில்லை.
இந்நிலையில், உனக்கும், உனது மகனுக்கும் ஏதாவது நடந்தால், அதற்கு நான் பொறுப்பல்ல, என்று என்னை மிரட்டுகிறார். எனது நகைகள் அனைத்தையும் விற்று விட்டார். தற்போது வீட்டை விட்டு என்னையும், மகனையும் துரத்துவதாக மிரட்டி வருகிறார். சில நாட்களாக, அவர் வீட்டுக்கே வருவதில்லை. இவரால் எனக்கும், எனது மகனுக்கும் ஆபத்து நேரலாம் என்று போலீசில் புகார் செய்துள்ளேன் என்றார்.
நடிகர் பிரசாந்த் எங்கிருக்கிறார் என்று தெரியவில்லை. கடந்த மாதம் நடிகர் தர்ஷன், அவரது மனைவியை கொடுமைப்படுத்தியதாக போலீஸில் புகாராகி, நீதிமன்றத்தில் வழக்கு நடந்து வருகிறது. இந்நிலையில் மற்றொரு நடிகரும் இதுபோன்ற புகாரில் சிக்கியுள்ளது குறிப்பிடத்தக்கது.

நடிகர் குடும்பத்தில் தினம் நடக்கும் நாடகம்தான் இது யாரச்சொல்ல