தெற்காசிய மாணவர் பொருளாதார மாநாடு இலங்கை குழுவினர் இந்தியா விஜயம்

தெற்காசிய மாணவர்கள் பொருளாதார மாநாட்டில் கலந்துகொள்வதற்காக கொழும்பு பல்கலைக்கழகத்தைச் சேர்ந்த 12 மாணவர்களும், 3 விரிவுரையாளர்களும் இந்தியா சென்றுள்ளனர். இக்குழுவினர் நேற்றைய தினம் இந்தியாவுக்குச் சென்றனர். இந்த மாநாடு டில்லி பல்கலைக்கழகங்களின் கீழ் இயங்கும் ரம்ஜாஸ் கல்லூரியில் இன்று 29 ஆம் திகதி முதல் நவம்பர் 5 ஆம் திகதி வரை நடைபெறவுள்ளது. இலங்கை நட்புறவு மன்றமும் இலங்கை மாணவர்களும் இந்த மாநாட்டில் பங்குகொள்ள வேண்டும் என்பதற்கு ஊக்கமளித்து வருகிறது. கடந்த வருடம் நவம்பர் 29 ஆம் திகதி முதல் டிசம்பர் 4 ஆம் திகதி வரை இந்தியாவில் நடைபெற்ற தெற்காசிய மாணவர்கள் பொருளாதார மாநாட்டில் இலங்கையின் சார்பில் 16 பிரதிநிதிகள் கலந்து கொண்டனர்.

இந்த மாநாடு தெற்காசிய பிராந்திய நாடுகளுக்கிடையில் நடத்தப்படுகின்ற பெருமைக்குரிய மாநாடாகும். பல்வேறு பல்கலைக்கழகங்களிலிருந்து இந்த மாநாட்டில் கலந்துகொள்ளும் பல்கலைக்கழக மாணவர்கள் பொருளாதாரம் தொடர்பில் தாம் நடத்திய ஆராய்ச்சிகள், ஆய்வுகள் குறித்த அறிக்கைகளை மாநாட்டில் சமர்ப்பித்து அதுபற்றிக் கலந்துரையாடுவார்கள்.

இப்பிராந்திய நாடுகளிலுள்ள மாணவர்கள் மத்தியில் கலாசார மற்றும் கல்வி நட வடிக்கைகளைப் பரிமாறிக்கொள்வதற்கு ஏதுவாகவே இந்த மாநாடு நடத்தப்படுவதாக இலங்கையிலுள்ள இந்தியத் தூதரகம் அறிவித்துள்ளது.