தமிழ்நாடு அரசுப் பணியாளர் தேர்வாணைய அதிகாரிகள் வழக்கு உயர்நீதிமன்றத்தில் இன்று விசாரணை

சென்னை, நவ.1- தமிழ்நாடு அரசுப் பணியாளர் தேர்வாணைய அதிகாரிகள் தொடர்பான வழக்குகளை சென்னை உயர்நீதிமன்றத்தில் இன்று விசாரணைக்கு எடுத்துக்கொள்கிறது.

தமிழ்நாடு அரசுப் பணியாளர் தேர்வாணைய தலைவர் செல்லமுத்து மற்றும் உறுப்பினர்களின் இருப்பிடங்களில் லஞ்ச ஒழிப்பு காவல்துறையினர் சோதனை மேற்கொண்டனர். இவர்களிடம் இருந்து ஏராளமான ஆவணங்கள் கைப்பற்றப்பட்டன.

அதைத் தொடர்ந்து சென்னை உயர்நீதிமன்றத்தில் வழக்கறிஞர் ஆர்.கிருஷ்ணமூர்த்தி பொதுநலன் வழக்கு தாக்கல் செய்தார். இவர்கள் கால கட்டத்தில் நடைபெற்ற நியமனங்கள் அனைத்தையும் ரத்து செய்ய வேண்டும் என்று அதில் கூறியிருந்தார்.

இந்த வழக்கை தலைமை நீதிபதி எம்.ஒய்.இக்பால், நீதிபதி டி.எஸ்.சிவஞானம் ஆகியோர் கடந்த 29- ஆம் தேதி விசாரித்தனர். தேர்வாணையத்தை லஞ்ச ஒழிப்பு காவல்துறையினரின் கண்காணிப்புக்கு கீழ் கொண்டு வந்து பிறப்பிக்கப்பட்ட அரசாணையை எதிர்த்து செல்லமுத்து மற்றும் தேர்வாணைய உறுப்பினர்கள் வேறு நீதிமன்றத்தில் வழக்கு தாக்கல் செய்துள்ளதாக விசாரணையின்போது நீதிபதிகளிடம் தெரிவிக்கப்பட்டது.

அதைத் தொடர்ந்து அனைத்து வழக்கையும் தங்களின் நீதிமன்றத்திற்கு மாற்ற வேண்டும் என்று நீதிபதிகள் உத்தரவிட்டனர். விசாரணையை 2 வாரங்களுக்கு நீதிபதிகள் தள்ளி வைத்தனர்.

இந்தநிலையில் தேர்வாணைய அதிகாரிகளின் சார்பில் மூத்த வழக்கறிஞர்கள் ஆர்.காந்தி, தியாகராஜன் மற்றும் வக்கீல் சங்கரன் ஆகியோர் தலைமை நீதிபதி எம்.ஒய்.இக்பால், நீதிபதி டி.எஸ்.சிவஞானம் முன்பு நேற்று ஆஜரானார்கள்.

தேர்வாணையம் ஒரு தன்னாட்சி பெற்ற அமைப்பு. எங்கள் தரப்பை கேட்காமல் உத்தரவு பிறப்பித்ததால் அதன் நடவடிக்கைகள் பாதிக்கப்பட்டுள்ளது. 2 வார காலங்கள் செயல்பட முடியாத நிலை உள்ளது. தேர்வாணையத்தின் சுதந்திரத்தை நீதிமன்றம் உத்தரவு பாதிக்கிறது.

இந்த விவகாரத்தில் எங்களின் கருத்தை கேட்க வேண்டும். எனவே அவசர வழக்காக எங்கள் வழக்குகளை விசாரிக்க வேண்டும் என்று கேட்டுக் கொண்டனர்.

அதைத் தொடர்ந்து தேர்வாணையம் தொடர்பான வழக்குகளை ஒன்றாம் தேதி (இன்று) விசாரணைக்கு எடுத்துக் கொள்வதாக நீதிபதிகள் குறிப்பிட்டனர்.
- நன்றி விடுதலை