குர்பான் கொடுப்போம்

by *சம்ஸ் Fri 4 Nov 2011 - 8:00

குர்பான் கொடுப்போம்
முழுஉலக மக்களாலும் கொண்டாடப் படுவது ‘ஈதுல் அழ்ஹா’ எனப்படும் தியாகத் திருநாள். உண்மையில் இதனை பெருமைக்குரிய திருநாள் என்றழைப் பதும் பொருத்தமாகும். ஏனெனில், அத்தகைய பெருமைக்குரிய ஒரு வரலாற்றை அல்லாஹ்வின் தோழர் ஹஸ்ரத் இப்றாஹீம் (அலை) அவர்கள் உருவாக்கிச் சென்றார்கள்.

ஆடு, மாடு, ஒட்டகங்களைப் பலியிட்டு ஆண்டு தோறும் செய்யப்படும் ‘குர்பானி’ ஹஸ்ரத் இப்றாஹீம் (அலை) அவர்களின் அந்த மகத்தான தியாகத்தை நமக்கு நினைவூட்டுகிறது.

குர்பானி’ அல்லாஹ்வின் சந்நிதானத்தில் அடியார்கள் செலுத்தும் சிறந்த ஒரு வணக்கமாக எல்லா நபி மார்களுடைய கூட்டத்தார் மீதும் கடமையாக்கப்பட்டு வந்துள்ளதை கீழ்வரும் அல்குர்ஆன் வசனம் குறிப்பிட்டும் காட்டுகின்றது. அல்லாஹ் அவர்களுக்குக் கொடுத்திருந்த ஆடு, மாடு, ஒட்டகைகள் மீது அவன் பெயரைக் கூறும் படி செய்வதற்காகவே ஒவ்வொரு வகுப்பாருக்கும் நாம் ‘குர்பானி’ செய்வதை கடமையாக ஏற்படுத்தி இருந்தோம் (அல்-குர்ஆன் 22:34)

இறைவனின் சந்நிதானத்தில் தன் பணியையும் நன்றியுணர்வையும் மனிதன் ஒளிபெறச் செய்யும் மேலான வணக்க முறை இது என்பது ஒர் உண்மையாகும். அல்லாஹ்வின் அருளைப் பெறுவதற்கு தனது செல்வத்தை அர்ப்பணிப்பதாலேயே இந்த வணக்க முறை ‘குர்பானி’ என்று கூறிச் சிறப்பிக்கின்றது.

உண்மையில் குர்பானியின் அந்தரங்க தாத்பரியம் என்னவெனில், மனிதன் இதன் மூலம் தியாக உணர்ச்சியைப் பெற்று தன் இதயத்தையும், சிந்தனையையும் ஒளிபெறச் செய்ய வேண்டும். தனக்குள்ளே ஈமானின் உறுதியையும், இறையச்சத்தையும் உருவாக்கிக் கொள்ள வேண்டும் என்பது தான். இதனையே அல்லாஹ் கீழ் வருமாறு கூறுகிறான்.

(‘இவ்வாறு குர்பான் செய்த போதிலும்) அதன் மாமிசமோ அல்லது அதன் இரத்தமோ அல்லாஹ்வை அடைந்து விடுவதில்லை. உங்களுடைய (பரிசுத்ததன்மையும்) பக்தியும் தான் அவனை அடையும். “(அல்குர்ஆன் 22:37) “எண்ணங்களைக் கொண்டே எல்லா அம்சங்களும் கணிக்கப்படும், மனிதன் அவன் எண்ணியதே கிடைக்கும் என்று நபி (ஸல்) அவர்களின் கூற்றுக் கேற்ப குர்பானியிலும் உள்ளத்தின் பரிசுத்தம் முக்கியமானதாகும்.

புகழைத் தேடித் தீர்த்துக் கொள்ளும் ‘குர்பானி’ இறைவனிடத்தில் அங்கீகரிக்கப்பட்ட மாட்டாது. ‘அல்லாஹ் அங்கீகரிப்பதெல்லாம் பயபக்தியுடையவர்களில் உள்ளவர்களுடைய குர்பானி’ களைத் தான் (அல்குர்ஆன் 5:27)

குர்பானிக்கு ஏற்ற மிருகங்கள் நன்கு கொழுத்ததாகவும் ஆரோக்கியமுடையதாகவும் இருத்தல் வேண்டும். இதைத் தான் பின்வரும் நபி மொழி எடுத்துக் காட்டுகின்றது. கொழுத்த மிருகங்களையே குர்பான் செய்யுங்கள். ஏனெனில் அவை ஸிராதுல் முஸ்தகிம் பாலத்தில் உங்களுடைய வாகனமாக உதவு பவை. (அல்-ஹதீஸ்)

எம்.யூ.எம். வாலிஹ் (அஸ்ஹரி)
வெலிகம