இறை அச்சத்தை அடையும் உழ்ஹிய்யா

by *சம்ஸ் Fri 4 Nov 2011 - 8:04

இறை அச்சத்தை அடையும் உழ்ஹிய்யா
உழ்ஹிய்யா என்பது ஹஜ்ஜுப் பெருநாள் தொழுகைக்குப் பின்னர் இறை திருப்தியை நாடி பிராணியை பலியிடுவதனைக் குறிக்கும். இவ்வாறு பிராணிகளைப் பலியிடும் பழக்கமானது ஏனைய மதத்தவரிடமும் இருப்பதனை காணலாம்.

இஸ்லாத்தை பொறுத்த வரையில் இறைவனின் அன்பைப் பெறுவதற்காக, இறை ஆணையை நிறைவேற்றல் என்ற ஒரே அம்சத்தை மட்டும் நினைவில் நிறுத்தி செய்யப்படும் வழிபாடே இதுவாகும். இந்த விஷயத்தில் நம்முடைய விருப்பு வெறுப்புக்கோ, சொந்தக் கருத்துக்கோ இடமளிக்காமல் இறைவனின் உத்தரவு ஒன்றுக்கு மட்டுமே முக்கியத்துவம் அளித்து இந்த வழிபாட்டை நிறைவேற்ற வேண்டும்.

“நபி (ஸல்) அவர்கள் ஈதுல் அழ்ஹா பெருநாளன்று ‘இன்றைய தினம் நாம் முதலாவதாகச் செய்யவேண்டியது யாதெனில் முதலில் நாம் பெருநாள் தொழுகை தொழுவோம். பிறகு தொழுகையிலிருந்து திரும்பிச் சென்று குர்பானிப் பிராணிகளை அறுப்போம். இதை யார் செய்கிறாரோ அவர் தமது வழியை அடைந்து கொண்டவர் ஆவார்.

பெருநாள் தொழுகைக்கு முன்பே யார் குர்பானிப் பிராணியை அறுக்கிறாரோ அவர் தம் குடும்பத்தாருக்காக முன்கூட்டியே தயார் செய்த சாதாரண இறைச்சியாகவே அது அமையும் அது (குர்பானி) வழிபாட்டில் எதிலும் சேராது” என்று சொன்னார்கள்.

அறிவிப்பவர்: பரா உ பின் ஆஸிப் (ரலி) நூல்: முஸ்லிம்

உழ்ஹிய்யாவை பெருநாள் தொழுகையை முடித்த பின்னர்தான் நிறைவேற்ற வேண்டும். தொழுகைக்கு முன்பதாக பிராணியை அறுத்தால் அப்பிராணி ஏனைய நாட்கள் சாதாரணமாக அறுக்கப்படும் பிராணிகளை போன்றதாக அமையும்.

உழ்ஹியாப் பிராணியை அறுப்பதனால் அதனுடைய இறைச்சியோ அல்லது, அதனுடைய இரத்தமோ இறைவனை அடையாது. மேலும் இறைவனுக்கு தேவையுமில்லை இவற்றை இறைவனுக்காக படைப்பதும் இதன் நோக்கமும் அல்ல. மாறாக எமது இறையச்சமே இறைவனை அடைகின்றது. இதனை பின்வரும் அல்குர்ஆன் வசனம் தெளிவுபடுத்துகின்றது.

(இவ்வாறு குர்பானி செய்யப்பட்ட) அவற்றின் மாமிசங்களோ அல்லது அவற்றின் இரத்தங்களோ அல்லாஹ்வை ஒருபோதும் அடைந்து விடுவதில்லை. எனினும் உங்களிலுள்ள பயபக்திதான் அவனை அடையும். உங்களை அவன் நேர்வழியில் செலுத்தியதற்காக (தக்பீர் கூறி) அல்லாஹ்வை நீங்கள் பெருமை படுத்துவதற்காக இவ்வாறு அவைகளை உங்களுக்கு வசப்படுத்தித் தந்துள்ளான். மேலும் நபியே நன்மை செய்வோருக்கு நீர் நன்மாராயம் கூறுவீராக.

(அல்குர்ஆன் 22:37)

இதேபோல் உபரியான தொழுகைகள், உபரியான நோன்புகள், அல்குர்ஆன் ஓதுதல், தான தர்மங்களில் ஈடுபடல், நன்மையை ஏவி தீமையை தடுத்தல், உறவினர்களுடன் நல்ல முறையில் நடந்துகொள்ளல், பிறருக்கு உதவுதல், பாவமன்னிப்புத் தேடுதல் போன்ற பல்வேறு நல்ல அமல்களில் ஈடுபட்டு துல்ஹஜ் மாதத்தின் முதல் பத்து நாட்களில் அல்லாஹ்வுக்கு விருப்பமான அமல்களை செய்த சிறப்பை பெற்றவர்களாக மாற முயற்சிப்போம்.

ஏ.எம். எம். அஸ்லம்
(இஸ்லாஹிய்யா வளாகம்)