மிகவும் வேண்டப்பட்ட நாடு அந்தஸ்து: பாகிஸ்தான் முடிவுக்கு பிரதமர் வரவேற்பு

""மிகவும் வேண்டப்பட்ட நாட்டிற்கான அந்தஸ்தை இந்தியாவுக்கு வழங்க பாகிஸ்தான் முன்வந்துள்ளதை வரவேற்கிறேன்,'' என பிரதமர் மன்மோகன் சிங் பேசினார்.

பிரான்ஸ் நாட்டின், கேன்ஸ் நகரில் நடக்கும், ஜி 20 மாநாட்டில் பங்கேற்கச் சென்ற இந்தியப் பிரதமர் மன்மோகன் சிங் அங்கு நிருபர்களிடம் கூறியதாவது:தெற்காசியப் பிராந்தியத்தின் வளர்ச்சியில், இந்தியா மற்றும் பாகிஸ்தானுக்கு சம அளவிலான பங்கு உண்டு. இருநாடுகளுக்கு இடையேயான வர்த்தக நலன்களை மேம்படுத்தும் விதமாக, மிகவும் வேண்டப்பட்ட நட்பு நாடு என்ற அந்தஸ்தை இந்தியாவுக்கு வழங்குவதாக, பாக்., அமைச்சரவை முடிவு செய்துள்ளதை வரவேற்கிறேன். இது ஒரு புதிய மாற்றத்திற்கான திறவுகோல். எனினும், இது மிகவும் காலதாமதமான முடிவு. ஏனெனில், 17 ஆண்டுகளுக்கு முன்பே, இத்தகைய அந்தஸ்தை அந்நாட்டுக்கு இந்தியா வழங்கி விட்டது.

இந்தியாவில், பெட்ரோல் விலை உயர்வை குறைக்கும் நடவடிக்கைகள் நிச்சயம் மேற்கொள்ளப்படும். அவ்விதம், பெட்ரோல் விலை கட்டுக்குள் வைக்கப்படும். இதில், மிகவும் கவனத்துடன் தொடர்ந்து, புதிய நடவடிக்கைகள் மேற்கொள்ளப்படும். எனினும், விற்பனை நிறுவனங்கள் மற்றும் பெட்ரோல் சந்தையை அதன் போக்கிலேயே செயல்பட அனுமதிப்பது அவசியம்.உணவுப் பணவீக்கம் ஒரு பிரச்னையல்ல. உணவு தானியங்கள் விலை, நிலையானதாக உள்ளது. எனினும், காய்கறி, முட்டை மற்றும் மீன் போன்ற இரண்டாந்தர உணவுப் பொருட்களின் விலையில்தான் பிரச்னை. இது உணவுப் பொருள் வினியோகத்தில் நிலவும் தேவையை உணர்த்துகிறது.வரி ஏய்ப்பு மற்றும் முறைகேடான முறையில் பணம் சேர்ப்பது போன்றவற்றை தடுக்க, வங்கிக் கணக்கு விவரங்களில் வெளிப்படைத் தன்மை வேண்டும் எனும், ஜி 20 நாடுகளின் முடிவை இந்தியா வரவேற்கிறது.இவ்வாறு பிரதமர் மன்மோகன் சிங் பேசினார்.

இதற்கிடையில், "இந்தியாவுக்கு வழங்கப்பட்ட "மிகவும் வேண்டப்பட்ட நாடு' அந்தஸ்தை திரும்பப்பெறும் பேச்சுக்கே இடமில்லை. இயல்பான வர்த்தக உறவின் ஒரு பகுதியே இந்த நடவடிக்கை' என, இந்தியாவுக்கான பாகிஸ்தான் தூதர் சாகித் மாலிக் கூறினார்.

இந்தியாவுக்கான பாகிஸ்தான் தூதர் நேற்று மத்திய உள்துறை அமைச்சர் சிதம்பரத்தை சந்தித்துப் பேசினார்.

பின்னர் அவர் செய்தியாளர்களிடம் கூறுகையில், ""இந்தியாவுக்கு "மிகவும் வேண்டப்பட்ட நாடு' அந்தஸ்து அளிக்கும் நடைமுறைகள் இயல்பாக நடந்து வருகின்றன. இந்த முடிவிலிருந்து பின்வாங்கும் பேச்சுக்கே இடமில்லை. பாகிஸ்தான் வர்த்தகத் துறை செயலர், இம்மாதம் இந்தியா வருகிறார். அப்போது, இதற்கான நடைமுறைகள் வழங்கப்படும்,'' என்றார்.