நூலக நிதியில் இருந்து கட்டப்பட்டது, அதனால் அரசு வேறு துறைக்கு வழங்க கூடாது

சென்னை கோட்டூர்புரத்தில் உள்ள அண்ணா நூற்றாண்டு நூலக கட்டிடம், மாவட்ட வாரியாக பெறப்பட்ட நூலக நிதியில் இருந்து கட்டப்பட்டது என்பதால், இந்த கட்டிடத்தை வேறு துறைக்கு வழங்க கூடாது என நூலகர்கள் எதிர்ப்பு தெரிவித்துள்ளனர்.
தமிழகத்தில் 4,028 நூலகங்கள் உள்ளன. இவற்றில் 2,354 பேர் பணிபுரிகின்றனர். பொது நூலக துறை கடந்த 1948ம் ஆண்டில் இருந்து நூலக விதி சட்டத்தின்படி செயல்படுகிறது.

இத்துறைக்கு என அரசு திட்டம் எதுவும் ஒதுக்கீடு செய்யப்படுவது இல்லை. பொதுமக்கள் செலுத்தும் வீட்டுவரியில் இருந்து 10 சதவீதம் ஒதுக்கப்பட்டு நிதி வழங்கப்படுகிறது. இந்த நிதியின் மூலம் பணியாளர்கள் சம்பளம், கட்டிடம், நூல்கள் உட்பட செலவினங்களும் மேற்கொள்ளப்படுகின்றன. கடந்த ஆட்சியில் உயர்கல்வி மாணவர்கள், ஆராய்ச்சி படிப்பு மாணவர்கள் மற்றும் அனைத்து தரப்பு மக்களுக்கும் பயன்படும் வகையில் சென்னை கோட்டூர்புரத்தில் உலக தரத்துக்கு இணையாக அண்ணா நூற்றாண்டு டிஜிட்டல் நூலகம் கட்டப்பட்டு திறக்கப்பட்டது.

இக்கட்டிடம் கட்ட அரசு திட்ட ஒதுக்கீடாக ரூ.20 கோடி வழங்கியது. இந்த நிதியுடன் ஒவ்வொரு மாவட்டத்தில் இருந்தும் பெறப்பட்ட நூலக நிதி ரூ.178 கோடியே 78 லட்சம் சேர்த்து இந்த நூலகம் கட்டப்பட்டது. இந்நிலையில் தமிழக அரசு இந்த கட்டிடத்தை குழந்தைகள் மருத்துவமனையாக மாற்றப் போவதாக அறிவித்துள்ளது. இது நூலகர்களிடையே பெரும் அதிர்ச்சியை ஏற்படுத்தி உள்ளது.

நூலக நிதி மூலம் கட்டப்பட்ட இந்த கட்டிடத்தை வேறு துறைக்கு வழங்கவோ, மாற்றவோ கூடாது என நூலகர்கள் எதிர்ப்பு தெரிவித்துள்ளனர். இக்கட்டிடத்தை நூலக துறைக்கே வழங்க வேண்டும் என அவர்கள் அரசுக்கு கோரிக்கை விடுத்துள்ளனர். இது குறித்து நூலகர்கள் சிலர் கூறுகையில், “ஆசிய கண்டத்திலேயே நூலக துறைக்கு என 7 மாடியில் நூலக நிதியின் மூலம் அண்ணா நூற்றாண்டு விழா நூலக கட்டிடம் கட்டப்பட்டது.

தற்போது தமிழக அரசு இக்கட்டிடத்தை வேறு துறைக்கு வழங்க முடிவு செய்துள்ளது. இது நூலக துறையின் வளர்ச்சியை பாதிக்கும். இக்கட்டிடத்தை வேறு துறைக்கு வழங்கினால் மீண்டும் நூலக துறைக்கு கிடைக்க வாய்ப்பில்லை. எனவே, அரசு இந்த அறிவிப்பை திரும்ப பெற வேண்டும். மேலும் பொதுமக்கள் மூலம் பெறப்படும் நூலக வரியை அந்தந்த மாவட்டத்தில் உள்ள நூலகங்களின் வளர்ச்சிக்கு பயன்படுத்த வேண்டும்“ என தெரிவித்தனர்