35 ஆயிரம் தந்தால் நான் ரூ.70 ஆயிரம் தருகிறேன்

மேலும் கீழும் ஒரிஜினல் 500 ரூபாயை வைத்து 70 ஆயிரம் கொடுத்து, ரூ.35 ஆயிரத்தை ஒரிசா வாலிபரிடம் அபேஸ் செய்த ஆசாமியை போலீசார் தேடுகின்றனர். ஒரிசாவை சேர்ந்தவர் பப்புஜி. இவரது மகன் தினேஷ் (25). பெருங்குடி சந்தோஷ் நகரில் உள்ள ஒரு லெதர் கம்பெனியில் வேலை பார்க்கிறார். இவருக்கு நேற்று முன்தினம் சம்பளம் வழங்கப்பட்டது.
அந்த பணம் உட்பட நண்பர்களின் பணம் என மொத்தம் ரூ.35 ஆயிரத்தை எடுத்துக் கொண்டு, பெருங்குடி ராஜிவ்காந்தி சாலையில் உள்ள ஒரு வங்கிக்கு சென்றுள்ளார்.

அப்போது, ஒரிசாவை சேர்ந்த மற்றொரு வாலிபரும் அங்கு வந்தார். அவர், தினேஷிடம் நைசாக பேச்சு கொடுத்துள்ளார். பின்னர், அவரை வெளியே அழைத்து வந்து, “ஸீ 35 ஆயிரம் தந்தால் நான் ரூ.70 ஆயிரம் தருகிறேன். அதை கொண்டுபோய் வங்கியில் செலுத்து’’ என்று கூறியுள்ளார்.

அதை நம்பி தன்னிடம் இருந்த 35 ஆயிரத்தை கொடுத்து, 500 ரூபாய் கட்டை வாங்கியுள்ளார். பின்னர், அந்த வாலிபர் வெளியில் நின்றுகொள்ள, தினேஷ் மட்டும் வங்கிக்குள் சென்றுள்ளார். கவுன்டரில் சென்று பணத்தை எண்ணியபோது, முதல் நோட்டும், கடைசி நோட்டும் மட்டுமே 500 ரூபாயாக இருந்த,, மற்றவை, அதேபோல வெட்டப்பட்ட பேப்பர் இருந்தது தெரிந்தது. அதிர்ச்சி அடைந்த தினேஷ் வெளியே ஓடி வந்து பார்த்தார். அதற்குள் அந்த வாலிபர் மாயமாகி விட்டார். இதுகுறித்து துரைப்பாக்கம் போலீசில் தினேஷ் புகார் செய்தார். போலீசார் வழக்கு பதிந்து, அந்த ஆசாமியை தேடி வருகின்றனர்.

பேராசை பெரும் நட்டம் என்பது இதுதான்.