2ஜி ஸ்பெக்ட்ரம் முறைகேடு: சுவிட்சர்லாந்துக்கு சி.பி.ஐ.குழு செல்கிறது

by **நண்பன்** Tue 15 Nov 2011 - 8:40

2ஜி ஸ்பெக்ட்ரம் ஒதுக்கீடு முறைகேட்டின் போது சில வெளிநாட்டு நிதி நிறுவனங்கள் மற்றும் வங்கிகள் மூலம் பணபரிமாற்றம் நடந்தது.

இதுபற்றி
சி.பி.ஐ. அதிகாரிகள் விசாரணை நடத்திய போது மொரிஷியஸ் மற்றும்
சுவிட்சர்லாந்து நாடுகளில் உள்ள நிறுவனங்கள் மூலம்தான் கோடிக்கணக்கான பணம்
கைமாறி உள்ளதை உறுதி செய்தனர்.

மொரிஷியஸ்,
சுவிட்சர்லாந்து நாடுகளுக்கு கடிதம் எழுதிய சி.பி.ஐ. அதிகாரிகள், சில நிதி
நிறுவனங்கள், வங்கிகளில் நடந்த பண பரிமாற்ற ஆவணங்களை கேட்டு கடிதம்
அனுப்பினார்கள். அதற்கு மொரிஷியஸ் அரசு ஒத்துக்கொண்டதால் சில மாதங்களுக்கு
முன்பு சி.பி.ஐ. அதிகாரிகள் மொரிஷியஸ் நாட்டுக்கு சென்று ஆதாரங்களை திரட்டி
வந்தனர்.

இதையடுத்து ஸ்வான் டெலிகாம் நிறுவனம்
கைமாறியதில் நடந்த முறைகேடுகள் பற்றி விசாரித்தபோது அதற்கான பணபரிமாற்றம்
சுவிட்சர்லாந்து நிறுவனங்கள் மூலம் நடந்தது தெரிய வந்தது. இது தொடர்பான
ஆவணங்களை கேட்டு சி.பி.ஐ. சுவிட்சர்லாந்து அரசுக்கு கடிதம் எழுதி
இருந்தது. சி.பி.ஐ.க்கு ஒத்துழைக்க சுவிட்சர்லாந்து சம்மதித்தது. அதன்
பேரில் சி.பி.ஐ. குழு ஒன்று சுவிட்சர்லாந்து நாட்டுக்கு செல்கிறது.

சாகித்
பல்வாவின் ஸ்வான் டெலிகாம் நிறுவனத்தை மொரிஷியஸ் நாட்டைச் சேர்ந்த டெல்லி
நிறுவனம் விலைக்கு வாங்கியது. டெல்லி நிறுவனம் போலி நிறுவனம் என்றும் இது
இந்தியர் ஒருவருக்கு சொந்தமானது என்றும் தெரிய வந்துள்ளது.

சுவிட்சர்லாந்து நாட்டில் கிடைக்கும் ஆவணங்கள் மூலம் டெல்லி நிறுவன விவகாரங்கள் வெளிச்சத்துக்கு வரும்.