மூடப்பட்ட சகல பாடசாலைகளையும் இன்று திறப்பதற்கு ஏற்பாடு

by **நண்பன்** Mon 17 Jan 2011 - 22:28

இடம்பெயர்ந்தோரை இடமாற்ற நடவடிக்கை
(மகேஸ்வரன் பிரசாத்)
கிழக்கு மாகாணத்தில் ஏற்பட்ட வெள்ளப்பெருக்குக் காரணமாக மூடப்பட்ட அனைத்துப் பாடசாலைகளையும் இன்று முதல் மீண்டும் திறப்பதற்கான நடவடிக்கைகள் மேற்கொள்ளப்பட்டிருப்பதாக கிழக்கு மாகாண கல்விப் பணிப்பாளர் எம்.ரி.எம். நிசாம் தெரிவித்தார்.

இடம்பெயர்ந்த மக்கள் தங்கவைக்கப்பட்டி ருக்கும் பாடசாலைகளிலுள்ளவர்களை வேறு இடங்களுக்கு மாற்றுவதற்கு நடவடிக்கை எடுக்குமாறு பிரதேச செயலாளர்களிடம் கோரிக்கை விடுக்கப்பட்டிருப்பதாகவும் அவர் தினகரனுக்குக் குறிப்பிட்டார்.

வெள்ளப் பெருக்கால் இடம்பெயர்ந்த மக்கள் கிழக்கு மாகாணத்திலுள்ள சுமார் 185 பாடசாலைகளில் தங்கவைக்கப்ப ட்டுள்ளனர். இந்தப் பாடசாலைகள் அனைத்தையும் இன்று முதல் திறப்பதற்கு நடவடிக்கை எடுக்கப்பட்டுள்ளதாகக் குறிப்பிட்ட கிழக்கு மாகாணக் கல்விப் பணிப்பாளர், நலன்புரி நிலையங்களாகப் பயன்படும் பாடசாலைகள் மற்றும் இன்னமும் வெள்ள நீர் சூழ்ந்திருக்கும் பாடசாலைகளை ஆரம்பிப்பது பற்றிய தீர்மானம் எடுக்கும் உரிமையை வலயக் கல்விப் பணிப்பாளர்களுக்கு வழங்கியிருப்பதாகவும் கூறினார்.

பெரும்பாலான பாடசாலைகளில் வெள்ள நீர் புகுந்திருந்ததால் இன்று, நாளை மற்றும் புதன்கிழமை ஆகிய தினங்களில் பாடசாலைகளைச் சுத்தம் செய்து பாடசாலைகளை ஆரம்பிப்பதற்கான இயல்பு சூழலை ஏற்படுத்துவதற்கான நடவடிக்கைகள் எடுக்கப்படும். பாடசாலைகளைச் சுத்தம் செய்யும் நடவடிக்கைகளில் பிராந்திய சுகாதார அதிகாரிகள், பிரதேச செயலக உறுப்பினர்கள், பிரதேச செயலாளர்கள் மற்றும் பாடசாலை மாணவர்களின் பெற்றோரின் உதவிகள் பெற்றுக்கொள்ளப்படவுள்ளன.

இடம்பெயர்ந்த மக்கள் தங்கவைக்கப்பட்டிருந்த பாடசாலைகளிலிருந்து அம் மக்களை வெளியேற்றிப் பாடசாலைகள் இயங்குவதற்கான சூழலை ஏற்படுத்திக்கொடுக்கும் பொறுப்பு பிரதேச செயலாளர்களுக்கு வழங்கப்பட்டுள்ளது. நலன்புரி நிலையங்களாகப் பயன்படுத்தப்பட்ட பாடசாலைகளில் ஏற்பட்ட சேதங்களையும் பிரதேச செயலாளர்களே நிவர்த்தி செய்து பாடசாலை நிர்வாகத்திடம் கையளிக்க வேண்டும் என்றும் எம்.ரி.ஏ. நிசாம் கூறினார்.