தி.மு.க. எம்.பி, நடிகர் ரித்தீஸ் நில அபகரிப்பு வழக்கில் கைது

by *சம்ஸ் Fri 18 Nov 2011 - 10:29

தி.மு.க. எம்.பி, நடிகர் ரித்தீஸ் நில அபகரிப்பு வழக்கில் கைது
தி.மு.க., எம்.பி.யும் சினிமா நடிகருமான ரித்தீஷ் நில மோசடி வழக்கில், நேற்று முன்தினம் அதிகாலை கைது செய்யப்பட்டார். போலி ஆவணங்களை தயார் செய்து, 1.5 கோடி இந்திய ரூபாய் மதிப்பு நிலத்தை அபகரித்தார் என்பது இவர் மீதான குற்றச்சாட்டு, கைதான ரித்தீஷ், நீதிமன்றத்தில் ஆஜர்படுத்தப்பட்டு, வேலூர் சிறையில் அடைக்கப்பட்டுள்ளார்.

இராமநாதபுரம் தொகுதியில் இருந்து, தி.மு.க. சார்பில் லோக்சபாவிற்கு தேர்ந்தெடுக்கப்பட்டவர் நடிகர் ரித்தீஷ். காஞ்சிபுரம் மாவட்ட பொலிஸார் மயிலாப்பூரில் உள்ள, நடிகர் ரித்தீஷ் வீட்டில் கைது செய்து, காஞ்சிபுரம் எஸ்.பி, அலுவலகத்திற்கு கொண்டு வந்தனர்.

காலை 11 மணிக்கு நடிகர் ரித்தீஷ் பொலிஸ் வேனில் ஏற்றப்பட்டு, ஸ்ரீ பெரும்புதூர் நீதிமன்றத்திற்கு கொண்டு செல்லப்பட்டார். அங்கு திரண்டிருந்த தி.மு.க., வினர் “பொய் வழக்கு போடாதே” என கோஷங்கள் எழுப்பினர்.

காலை 12 மணிக்கு, ஸ்ரீபெரும்புதூர் குற்றவியல் நடுவர் நீதிமன்றத்தில், நடிகர் ரித்தீஷ் ஆஜர்படுத்தப்பட்டார். அவரை 15 நாள் நீதிமன்றக் காவலில் வைக்கும்படி, நீதிபதி அப்துல் மாலிக் உத்தரவிட்டார். ரித்தீஷ் தரப்பில் ஆஜரான வழக்கறிஞர் பாபுமுத்துமீரான், நீதிபதியிடம் ரித்தீஷை, புழல் சிறைக்கு அனுப்பும்படி கோரினார்.

ஆனால், “ஸ்ரீபெரும்புதூர் நீதிமன்றத்தில் ஆஜர்படுத்தப்படுவோர். வேலூர் சிறைக்கு அனுப்பட வேண்டும் என மேல்நீதிமன்றம் அறிவுறுத்தியுள்ளது. எனவே, ரித்தீஷ், வேலூர் சிறைக்கு கொண்டு செல்லப்படுவார்’ என, நீதிபதி அறிவித்தார். அதைத் தொடர்ந்து, அவருக்கு சிறையில் முதல் வகுப்பு அறை ஒதுக்கும்படி வழக்கறிஞர் கோரினார். அதற்கு நீதிபதி சம்மதம் தெரிவித்து உத்தரவிட்டார்.

நீதிமன்றத்திற்கு வெளியே, தி.மு.க. மாவட்டச் செயலாளர் அன்பரசன் தலைமையில் திரண்டிருந்த தி.மு.க.வினர், பொலிசுக்கு எதிராகவும், அரசுக்கு எதிராகவும் கோஷம் எழுப்பினர் நீதிமன்றத்திலிருந்து நடிகர் ரித்தீஷை பொலிஸார், ஸ்ரீபெரும்புதூர் அரசு மருத்துவம¨னைக்கு அழைத்துச் சென்றனர். அங்கு மருத்துவப் பரிசோதனை முடிந்த பின், அவர் சிறைக்கு அனுப்பப்பட்டார்.

இது குறித்து கூடுதல் எஸ்.பி., பாஸ்கரன் கூறும்போது, “நடிகர் ரித்தீஷ் மீது, ஆள் மாறாட்டம், மோசடி, நிலம் அபகரிப்பு, ஏமாற்றுதல் என ஆறு சட்டப் பிரிவுகளின் கீழ் வழக்குப் பதிவு செய்யப்பட்டுள்ளது.

சாமிகண்ணு என்பவர் கொடுத்த புகாரின் பேரில், விசாரணை நடத்திய போது, நடிகர் ரித்தீஷ் போலி ஆவணங்கள் தயாரித்து, நில மோசடி செய்தது தெரியவந்தது. அதன் பின்னரே அவரை கைது செய்தோம். இது தொடர்பாக பிரதமர் மற்றும் லோக்சபா சபாநாயகருக்கு தகவல் அனுப்பியுள்ளோம். இவ்வழக்கு தொடர்பாக, சார்பதிவாளர் அலுவலக ஊழியர்களிடமும் விசாரணை நடத்த உள்ளோம்” என்றார்.

ரித்தீஷ் கூறும்போது, அ.திமு.க. ஆட்சிக்கு வந்த பிறகு, தி.மு.க.வினர் மீது பொய் வழக்குகள் போடப்படுகிறது. அதுபோல் இதுவும் ஒரு பொய் வழக்கு இதை முறைப்படி நீதிமன்றத்தில் சந்திப்பேன்’ என்றார்.