விலை உயர்வை ஏற்று ஒத்துழைப்பு தாருங்கள்

மத்திய அரசு நிதி தரவில்லை
விலை உயர்வை ஏற்று ஒத்துழைப்பு தாருங்கள்
முதலமைச்சர் ஜெயலலிதா
மத்திய அரசு தமிழகத்தை அடியோடு புறக் கணித்துள்ள நிலையில், தவிர்க்க முடியாத சூழ்நிலையில் அறிவிக்கப் பட்டுள்ள விலை உயர்வுகளை ஏற்று ஒத்துழைப்பு அளிக்க வேண்டும் என பொதுமக்களிடம் முதலமைச்சர் ஜெயலலிதா கேட்டுக் கொண்டுள்ளார்.

பஸ் கட்டணம், பால் விலை உயர்வு குறித்த அறிவிப்பை வியாழக்கிழமை அவர் வெளியிட்டு பேசியது.

மின்சார சபையில் நிதிநிலையை மேம்படுத்தும் வகையில் சிறப்பு உதவிகள் வழங்கப்பட வேண்டும் என்பது உள்ளிட்ட பல்வேறு கோரிக்கைகளை வலியுறுத்தி கடந்த ஜூன் 14ம் திகதி பிரதமர் மன்மோகன் சிங்கை சந்தித்து கோரிக்கை மனு அளித்தேன்.

இந்த கோரிக்கை மனு மத்திய திட்டக் குழுவுக்கு அனுப்பப்பட்டு உள்ளதாகவும், திட்டக் குழு அதுகுறித்து உரிய முடிவெடுக்கும் எனவும் பிரதமர் தெரிவித்தார். இந்த விஷயம் குறித்து மத்திய திட்டக் குழு துணைத் தலைவர் மான்டெக் சிங் அலுவாலியாவிடமும் நினைவுபடுத்தினேன். ஆனாலும் திட்டக் குழுவிடம் இருந்தோ அல்லது மத்திய அரசிடம் இருந்தோ எந்த நிதியுதவியும் கிடைக்கவில்லை. மேற்கு வங்கத்துக்கு கிடைத்தது மத்திய காங்கிரஸ் கூட்டணியில் அங்கம் வகிக்கும் மேற்கு வங்க அரசுக்கு மட்டும் ரூ. 21,614 கோடி அளவுக்கு மத்திய அரசு நிதி தொகுப்பு உதவி வழங்கியுள்ளது.

காங்கிரஸ் தலைமையிலான மத்திய கூட்டணி அரசில் அங்கம் வகிக்காத கட்சிகள் ஆளும் மாநில அரசுகளை மத்திய அரசு புறக்கணித்து வருகிறது.

மத்திய அரசு எந்த உதவியையும் தமிழகத்துக்குச் செய்ய முன்வராத நிலையில் தமிழகத்தின் நிதி நிலைமை பாதாளத்தில் இருக்கிறது. முடங்கும் நிலையில் இருக்கின்ற பொதுத் துறை நிறுவனங்களை குறிப்பாக மக்களின் பயன்பாட்டுக்காக ஏற்படுத்தப்பட்டு திவாலாகும் நிலையில் இருக்கின்ற பொதுத் துறை நிறுவனங்களை நிலை நிறுத்த வேண்டிய அவசியம் இப்போது ஏற்பட்டு இருக்கிறது.

தமிழகத்துக்கு மத்திய அரசு ஒரு ரூபாயைக் கூட அளிக்கவில்லை மாநில அரசு ஒரு லட்சம் கோடி ரூபாய்க்கும் மேல் கடனில் தத்தளித்துக் கொண்டிருக்கிறது. மக்களுக்கு வேண்டுகோள் எத்தனை முறை கேட்டாலும் தமிழகத்துக்கு உதவி செய்ய மத்திய அரசு மறுக்கும் போது தமிழக மக்களாகிய உங்களிடம் வராமல் நான் வேறு யாரிடம் சென்று உதவி கேட்க முடியும்?

தி.மு.க. அரசு தமிழகத்தை முற்றிலுமாக சீரழித்து விட்டு, கடனாளி ஆக்கி விட்டு திவாலாகும் நிலைக்கு தள்ளிவிட்டது. தமிழகத்தைச் சீரமைக்க மத்திய அரசு ஓரளவுக்காவது உதவி செய்யும் என எதிர்பார்த்து கடந்த 6 மாதங்களாக நம்பிக்கையுடன் காத்திருந்தேன். ஆனால், மாற்றாந்தாய் மனப்பான் மையுடன் மத்திய அரசு தமிழகத்தை அடியோடு புறக்கணித்து கைவிட்டது. எனவே தவிர்க்க முடியாத இந்த உயர்வுகளை ஏற்றுக் கொண்டு அரசுக்கு முழு ஒத்துழைப்பை நல்க வேண்டும் என்று முதலமைச்சர் ஜெயலலிதா வேண்டுகோள் விடுத்துள்ளார்.