உலகக் கிண்ணம் இன்னும் 33 நாட்கள்

by **நண்பன்** Mon 17 Jan 2011 - 22:58

1844 ஆம் ஆண்டு செப்டம்பர் 24 ஆம் திகதி முதன் முறையாக சர்வதேச அளவில் கிரிக்கெட் விளையாடப்பட்டது. இந்த ஆட்டம் கனடா, அமெரிக்க நாடுகளுக்கு இடையில் நடைபெற்றது. டெஸ்ட் போட்டி 1877 ஆம் ஆண்டு அவுஸ்திரேலிய, இங்கிலாந்து அணிகளுக்கு இடையில் முதல் முறையாக நடைபெற்றது.

அதன் பிறகு தொடர்ச்சியாக இவ்விரு நாடுகளுக்கு இடையிலான போட்டி ஆஷஸ் தொடர் என்ற பெயரில் இப்போது வரை நடைபெற்று வருகிறது.

1900 ஆம் ஆண்டில் பாரீஸில் நடைபெற்ற கோடைக்கால ஒலிம்பிக் போட்டியில் கிரிக்கெட் சேர்க்கப்பட்டது. இந்தப் போட்டியில் பிரிட்டன், பிரான்ஸ் வீழ்த்தி தங்கப்பதக்கத்தைக் கைப்பற்றியது. அதன்பிறகு கிரிக்கெட் போட்டி ஒலிம்பிக்கில் சேர்க்கப்பட வில்லை.

காலம் காலமாக வளர்ச்சி பெற்று வந்த கிரிக்கெட் 1960 களில் தான் உலக அளவில் புகழ்பெற ஆரம்பித்தது. அதற்கு இங்கிலாந்து கவுன்டி கிளப் போட்டிகள் முக்கிய காரணமாக அமைந்தன. அவர்கள்தான் ஒரேநாளில் நடைபெற்று முடியும் வகையில் ஒருநாள் போட்டிகளை அறிமுகப் படுத்தினர்.

அதன் பிறகு 1962 ஆம் ஆண்டில் நான்கு நாடுகள் பங்கேற்கும் மிட்லாண்ட கோப்பை போட்டி அறிமுகப்படுத்தப்பட்டது.

சர்வதேச அளவிலான முதல் ஒருநாள் கிரிக்கெட் போட்டி 1971 ஆம் ஆண்டு நடைபெற்றது. மெல்போர்னில் நடைபெற்ற இங்கிலாந்து, அவுஸ்திரேலிய அணிகளுக்கு இடையிலான டெஸ்ட் போட்டியின் முதல் 4 நாள் ஆட்டம் மழையால் பாதிக்கப்பட்டது.

இதனால் ஏமாற்றமடைந்த ரசிகர்களுக்கு மகிழ்ச்சியை ஏற்படுத்தும் வகையில் இறுதி நாளன்று 40 ஓவர்கள் கொண்ட கிரிக்கெட் போட்டி நடத்தப்பட்டது. அப்போது ஓவருக்கு 8 பந்துகள் வீசப்பட்டன. இதையடுத்து ஒருநாள் போட்டிகள் இங்கிலாந்து மட்டுமின்றி அனைத்து நாடுகளிலும் புகழ்பெற்றன.

இதையடுத்து உலகக் கோப்பை கிரிக்கெட் போட்டியை நடத்த சர்வதேச கிரிக்கெட் சபை (ஐ.சி.சி) முடிவு செய்தது.

அதில் பிறந்ததுதான் உலகக் கோப்பை கிரிக்கெட் போட்டி. முதல் உலகக் கோப்பை போட்டி 1975 ஆம் ஆண்டு ஜூன் 7 ஆம் திகதி தொடங்கியது. அப்போது ஓவருக்கு 6 பந்துகள் வீதம் 60 ஓவர்கள் வீசப்பட்டன. வீரர்கள் வெள்ளை நிற உடைகளை அணிந்திருந்தனர். சிவப்பு நிற பந்துகள் பயன்படுத்தப்பட்டன.

முதல் உலகக் கோப்பையில் டெஸ்ட் போட்டியில் விளையாடும் அந்தஸ்தைப் பெற்றிருந்த இந்தியா, அவுஸ்திரேலியா, இங்கிலாந்து, மேற்கிந்தியதீவுகள், நியூசிலாந்து, பாகிஸ்தான் மற்றும் டெஸ்ட் போட்டியில் விளையாடாத இலங்கை, கிழக்கு ஆபிரிக்கா என மொத்தம் 8 நாடுகள் பங்கேற்றன.

இங்கிலாந்து, மேற்கிந்தியதீவுகள், அவுஸ்திரேயா, நியூசிலாந்து ஆகிய அணிகள் அரையிறுதிக்குத் தகுதிபெற்றன.

அரையிறுதியில் மேற்கிந்தியத் தீவுகள் அணி நியூசிலாந்தையும், அவுஸ்திரேலிய அணி, இங்கிலாந்தையும் வீழ்த்தி இறுதிப் போட்டிக்குத் தகுதிபெற்றன.

மேற்கிந்திய தீவுகள் அணி 17 ஓட்ட வித்தியாசயத்தில் அவுஸ்திரேலியாவை தோற்கடித்து கோப்பையைக் கைப்பற்றி கிரிக்கெட்டில் முதல் உலகச் சம்பியன் என்ற பெருமையைப் பெற்றது. இறுதி ஆட்டத்தில் மேற்கிந்திய தீவுகள் தலைவர் கிளைவ் லாயிட் 85 பந்துகளில் 102 ஓட்டங்களை குவித்தார். இந்த ஆட்டத்தில் அவுஸ்திரேலியாவின் 5 முன்னணி வீரர்கள் ரன்அவுட் ஆகினர். அதில் 3 பேரை விவியன் ரிச்சர்ட்ஸ் ரன்அவுட் செய்தது குறிப்பிடத்தக்கது.

இந்த உலகக் கோப்பையில் நியூசிலாந்தின் கிளன் டேர்னர் 333 ஓட்டங்கள் குவித்து அதிக ஓட்டங்களை குவித்தவர் என்ற பெருமையைப் பெற்றார். அவுஸ்திரேலியாவின் கேரிகில்மோர் 11 விக்கெட்டுகளை வீழ்த்தி அதிக விக்கெட்டுகளை வீழ்த்தியவர் என்ற பெருமையைப் பெற்றார்..