குற்றவாளி சிக்குவானா என்று ஜோதிடரிடம் குறி கேட்ட போலீசார்

by **நேசமுடன் ஹாசிம்** Sat 19 Nov 2011 - 16:12

சங்கரன்கோவில் அருகே வங்கி காவலாளி கொலையில் துப்பு கிடைக்காததால் போலீசார் ஜோதிடரை அணுகி குறி கேட்டுள்ளனர்.
சங்கரன்கோவில் தாலுகா திருவேங்கடம் அருகே உள்ள நடுவப்பட்டி கிராமத்தில் தொடக்க வேளாண்மை கூட்டுறவு கடன் வங்கியின் காவலாளி ராமராஜ்(47) கடந்த மாதம் 25ம் தேதி நள்ளிரவு துப்பாக்கியால் சுட்டுக்கொல்லப்பட்டார். 6 தனிப்படை அமைத்து கொலையாளியை போலீசார் தேடி வருகின்றனர்.

வங்கி செயலாளர், ஊழியர்கள் மட்டுமின்றி ஊர் பிரமுகர்களிடமும் விசாரணை நடத்தியதில் பலன் இல்லை. மேலும் காவலாளியை சுட்டுக் கொல்ல பயன்படுத்திய துப்பாக்கி வெளிநாட்டில் தயாரிக்கப்பட்டதாக தெரிகிறது. இலங்கை அகதிகள் மூலம் இந்த துப்பாக்கி கொண்டு வரப்பட்டிருக்கலாம் என்ற சந்தேகம் வந்ததால் விருதுநகர் மாவட்டம் கண்டியாபுரத்தில் உள்ள அகதிகள் முகாமில் உள்ளவர்களிடம் போலீசார் விசாரணை நடத்தியுள்ளனர். வங்கியில் கொள்ளையடிக்க வந்தவர்கள் காவலாளி தடுத்ததால் துப்பாக்கியால் சுட்டுள்ளனர் என்றாலும் கூட அவர்கள் கொள்ளை முயற்சி எதிலும் ஈடுபடவில்லை. இதனால் தீவிரவாத இயக்கத்தை சேர்ந்த கும்பல் தான் இதை செய்ததா? என்ற கோணத்திலும் விசாரணை நடக்கிறது.
25 நாட்கள் ஆகியும் துப்பு துலங்கவில்லை. இந்நிலையில், தனிப்படையில் உள்ள சில போலீசார் எட்டையபுரம் அருகே கீழ ஈரால் பகுதியில் உள்ள மஞ்சநாயக்கன்பட்டியில் குறிசொல்லும் ஜோதிடர் ஒருவரை சந்தித்து இந்த கொள்ளையில் குற்றவாளி சிக்குவானா என்று குறி கேட்டுள்ளனர்.