யாழ்ப்பாணப் பொங்கல் விழாவில் ஜனாதிபதிக்கு கோலாகல வரவேற்பு

by **நண்பன்** Tue 18 Jan 2011 - 10:47

யாழ்ப்பாணத்தில் நேற்று திங்கட்கிழமை இடம்பெற்ற பொங்கல் விழாவில் கலந்துகொண்ட ஜனாதிபதி மகிந்த ராஜபக்ஷ கிரீடம் அணிவிக்கப்பட்டு மலர்கள் தூவி மேள தாளத்துடன் வரவேற்கப்பட்டார்.

தேசிய பொங்கல் விழா நேற்று திங்கட்கிழமை காலை யாழ்.துரையப்பா விளையாட்டரங்கில் அமைக்கப்பட்டிருந்த விசேட பந்தலில் இடம்பெற்றது. இதில் ஜனாதிபதி மகிந்த ராஜபக்ஷ பிரதம அதிதியாகக் கலந்துகொண்டு பொங்கல் பால் ஊற்றி பொங்கல் அரிசி போட்டு பொங்கல் விழாவை ஆரம்பித்து வைத்தார்.

பொங்கல் விழாவைத் தொடர்ந்து 41 விவசாயிகளுக்கு 41 உழவு இயந்திரங்களையும் 34 இந்து ஆலயங்களுக்கான புனரமைப்புக்கென 34 இலட்சம் ரூபா நிதியுதவியையும் 100 பல்கலைக்கழக மாணவர்களுக்கு 100 மடிக் கணினிகளையும் ஜனாதிபதி வழங்கினார்.

இந்த விழாவில் ஜனாதிபதி மகிந்த ராஜபக்ஷவுக்கு அமைச்சர் டக்ளஸ் தேவானந்தா, யாழ்.மாநகர மேயர் யோகேஸ்வரி பற்குணராஜா ஆகியோர் பொன்னாடை போர்த்தி நினைவுச்சின்னம் வழங்கினர்.

இப்பொங்கல் விழாவில் அமைச்சர் டக்ளஸ் தேவானந்தா,மத விவகாரங்களுக்கான பிரதியமைச்சர் எம்.கே.டி.எஸ்.குணவர்த்தன, பாராளுமன்றக் குழுக்களின் பிரதித் தலைவர் முருகேசு சந்திரகுமார், தமிழ்த் தேசியக் கூட்டமைப்பின் யாழ்.மாவட்ட எம்.பி. அப்பாத்துரை விநாயகமூர்த்தி, ஐ.தே.க. வின் யாழ்.மாவட்ட எம்.பி. திருமதி விஜயகலா மகேஸ்வரன், ஈ.பி.டி.பி.யின் யாழ்.மாவட்ட எம்.பி. அலன்ரின் வட மாகாண ஆளுநர் மேஜர் ஜெனரல் சந்திரசிறி,யாழ்.மாநகர மேயர் யோகேஸ்வரி பற்குணராஜா, யாழ். மாவட்ட அரச அதிபர் இமெல்டா சுகுமார் மற்றும் மதத் தலைவர்கள்,பிரமுகர்கள் உட்பட பெருமளவிலான பாடசாலை மாணவர்களும் பொதுமக்களும் இதில் கலந்துகொண்டனர்.

இவ்விழாவில் ஜனாதிபதி மகிந்த ராஜபக்ஷ சிறிதுநேரம் தமிழில் உரையாற்றிய அதேவேளை தேசியகீதம் சிங்கள மொழியிலேயே பாடப்பட்டது.