உ.பி. மாநிலத்தை நான்காக பிரிக்கும் தீர்மானம் நிறைவேறியது லக்னோ

by *சம்ஸ் Wed 23 Nov 2011 - 6:28

உ.பி. மாநிலத்தை நான்காக பிரிக்கும் தீர்மானம் நிறைவேறியது
லக்னோ:
உ.பி, மாநிலத்தை நான்கு சிறிய மாநிலங்களாக பிரிப்பது தொடர்பான தீர்மானம், எதி ர்க்கட்சிகளின் கடும் அமளிக்கு இடையே, குரல் வாக்கெடுப் பின் மூலம் அம்மாநில சட்ட சபையில் நேற்று முன்தினம் நிறைவேற்றப்பட்டது. இந்த நடவடிக்கையை “மாயாவதியின் தேர்தல் ஸ்டண்ட்” என, எதிர்க்கட்சிகள் கடுமையாக விமர்சித்துள்ளன.

உ.பி, மாநிலத்தை நிர்வாக வசதிக்காக பூர்வாஞ்சல், பச்சிம் பிரதேசம், பண்டகல்கண்ட, அவாத் பிரதேசம் என, நான்கு சிறிய மாநிலங்களாக பிரிக்க திட்டமிட்டுள்ளதாக, முதல்வர் மாயாவதி கடந்த வாரம் அறிவித்து இருந்தார். இது குறித்து பிரதமர் மன்மோகன் சிங்கிற்கு கடிதமும் எழுதியிருந்தார்.

இந்நிலையில் உ.பி., சட்டசபையின் குளிர்கால கூட்டத் தொடர் நேற்று முன்தினம் தெரிவாகியது. அப்போது, சமாஜ்வாடி, பா.ஜ., உள்ளிட்ட கட்சிகளின் உறுப்பினர்கள், கடும் அமளியில் ஈடுபட்டனர். “மாயாவதி அரசு மக்களின் நம்பிக்கையை இழந்து விட்டது.

உடனடியாக பதவி விலக வேண்டும்’ என்ற முழக்கங்களை எழுப்பியபடி, சபையின் மையப் பகுதிக்கு வந்து, அமளியில் ஈடுபட்டனர். மாநில அரசுக்கு எதிராக, நம்பிக்கை இல்லா தீர்மானம் கொண்டு வரப் போவதாகவும் அவர்கள் கூறினர். தொடர்ந்து அமளி நிலவியதால், சபாநாயகர் சுக்தியோ ராஜ்பார், மதியம் 12.20 வரை சபையை ஒத்தி வைத்தார்.

மீண்டும் சபை கூடியபோதும், எதிர்க்கட்சி உறுப்பினர்கள் அமளியை தொடர்ந்தனர். அப்போது சபைக்கு வந்திருந்த முதல்வர் மாயாவதி, உ.பி., மாநிலத்தை, நான்கு சிறிய மாநிலங்களாக பிரிக்க வகை செய்யும் தீர்மானத்தை தாக்கல் செய்தார்.

கடும் அமளிக்கு இடையே, மாயாவதி கொண்டு வந்த தீர்மானம் குரல் ஒட்டெடுப்பு மூலம் நிறைவேறியதாக அறிவிக்கப்பட்டது. அத்துடன், கால வரையின்றி, சபையை ஒத்திவைப்பதாகவும் சபாநாயகர் அறிவித்தார்.

இதனால், எதிர்க்கட்சி உறுப்பினர்கள் செய்வதறியாது திகைத்தனர். அவர்கள் கொண்டு வர திட்டமிட்டிருந்த நம்பிக்கை இல்லா தீர்மானத்துக்கும் வேலை இல்லாமல் போய் விட்டது. மாநிலத்தை நான்காக பிரிக்கும் விவகாரத்தில், தங்களின் எதிர்ப்புகளை கூட, சபையில் பதிவு செய்ய முடியவில்லை என, எதிர்க்கட்சி, உறுப்பினர்கள் ஆவேசத்துடன் தெரிவித்தனர்.

உ.பி., முதல்வர் மாயாவதி, கூறியதாவது, நிர்வாக வசதிக்காக மாநிலத்தை பிரிக்க வேண்டிய அவசியம் ஏற்பட்டுள்ளது. அப்போது தான் வளர்ச்சி பணிகளை முழு வீச்சில் மேற்கொள்ள முடியும். இதுகுறித்து மத்திய அரசுக்கு ஏற்கனவே தெரிவித்து விட்டோம். ஆனால் மத்திய அரசு எந்த நடவடிக்கையும் எடுக்கவில்லை.

வேறு வழியில்லாமல், கட்டாயத்தின்பேரில், இந்த தீர்மானம் நிறைவேற்றப்பட்டது. இந்த தீர்மானம், மத்திய அரசுக்கு அனுப்பி வைக்கப்படும். இவ்வாறு மாயாவதி கூறினார்.