இரு முடி எடுத்து செல்ல விமானத்தில் கெடுபிடி: கையில் வைத்துக் கொள்ள அனுமதி மறுப்பு

இரு முடி எடுத்து செல்ல விமானத்தில் கெடுபிடி: கையில் வைத்துக் கொள்ள அனுமதி மறுப்பு
விமானத்தில் சபரிமலைக்கு செல்லும் ஐயப்ப பக்தர்கள், இரு முடியை எடுத்துச் செல்ல தனியார் விமான நிறுவனம் சில கட்டுப்பாடுகளை விதித்துள்ளது. இதனால் இதுவரை கைப் பையில் வைத்து எடுத்துச் சென்ற இரு முடிகள், பொதிகள் மூலம் கொண்டு செல்லப் பட்டன. கேரளாவிலுள்ள சபரிமலைக்கு ஆண்டு தோறும் இலட்சக்கணக்கான பக்தர்கள் விரதமிருந்து சென்று வருகின்றனர்.

சபரிமலை யாத்திரிகையின் போது இரு முடி எடுத்துச் செல்வது ஐதீகம், கனடா, சிங்கப்பூர், மலேசியா, நேபாளம், இலங்கை உள்ளிட்ட வெளிநாடுகளில் வசிப்போரும் இரு முடி தாங்கி விமானம் மூலம் கேரளாவின் பல்வேறு விமான நிலையங்களுக்கு சென்று அங்கிருந்து சபரிமலை செல்கின்றனர்.

இவர்கள் விமான பயணத்தின் போது தங்களுடனேயே இரு முடியை கைப் பையில் வைத்துக் கொள்ள இதுவரை எந்த தடையும் இருத்ததில்லை. இந்நிலையில் நேற்று முன்தினம் காலை சென்னையிலிருந்து கொச்சி புறப்பட்ட தனியார் விமானம் மூலம் கொச்சி சென்ற ஐயப்ப பக்தர்களின் இரு முடிவுள் கைப் பையில் கொண்டு செல்ல அனுமதி மறுக்கப்பட்டது.

இதையடுத்து பக்தர்கள் இரு முடியை பொதிகளில் இட்டு எடுத்துச் சென்றனர்.

இரு முடியை எடுத்துச் செல்வதற்கு என்ன வரைமுறை என்று விமான நிலைய பாதுகாப்பு அதிகாரிகளை கேட்ட போது "விமானத்தில் ஏற்றப்படும் எந்த பொருளும், இரண்டடுக்கு ஸ்கேனிங்கிற்கு பின் அனுமதிக்கப் படுகின்றன. இந்த வகையில் இருமுடியும் ஸ்கேனிங் செய்யப்பட்டு பக்தர்களிடம் திருப்பி தரப்படுகிறது. இதை தவிர இரு முடி எடுத்துச் செல்ல எந்த விதிமுறைகளும் புதிதாக விதிக்கப் படவில்லை என்றனர்.

தகவலுக்கு நன்றி.