கனிமொழி, ராசா கடும் ஆட்சேபம்

by *சம்ஸ் Thu 24 Nov 2011 - 6:20

கனிமொழி, ராசா கடும் ஆட்சேபம்:
ஸ்பெக்ட்ரம் வழக்கை திஹார் சிறை நீதிமன்றுக்கு மாற்ற உயர் நீதிமன்று தடை
டில்லி உயர்நீதிமன்ற உத்தரவுப்படி ஸ்பெக்ட்ரம் வழக்கு விசாரணை இன்று முதல் டில்லி திகார் சிறைக்கு மாற்றப்படுகிறது. இதற்கு ஆ. ராசா உட்பட குற்றம் சாட்டப்பட்ட அனைவரும் எதிர்ப்பு தெரிவித்தனர். டில்லி உயர் நீதிமன்றத்தில் மேன்முறையீடு செய்ய அவர்கள் முடிவு செய்துள்ளனர்.

2 ஜி ஸ்பெக்ட்ரம் ஊழல் வழக்கில் முன்னாள் தொலைத்தொடர்பு துறை மந்திரி ஆ. ராசா தி. மு. க. எம்.பி. கனிமொழி உட்பட 17 பேர் குற்றம் சாட்டப்பட்டு உள்ளனர். இவ்வழக்கு விசாரணை, டில்லி பாட்டியாலா ஹவுஸ் நீதிமன்ற வளாகத்தில் உள்ள சி. பி. ஐ. நீதிமன்றத்தில் நடைபெற்று வருகிறது.

இந்நிலையில், இவ்வழக்கு விசாரணை நடைபெறும் இடத்தை பாட்டியாலா ஹவுஸ் நீதிமன்ற வளாகத்தில் இருந்து டில்லி திகார் சிறை வளாகத்துக்கு மாற்ற டில்லி உயர் நீதிமன்றம் உத்தரவிட்டுள்ளது.

இதுதொடர்பான அறிக்கையை இந்த வழக்கை விசாரிக்கும் நீதிபதி ஓ. பி. சைனிக்கு டில்லி உயர் நீதிமன்றம் அனுப்பி வைத்துள்ளது. ஸ்பெக்ட்ரம் வழக்கில் அரசுத் தரப்பு சாட்சியும் எச். டி. எப். சி. வங்கி துணைத் தலைவருமான உதய் சாகஸ்ரபுத்தேவிடம் நேற்று முன்தினம் குறுக்கு விசாரணை நடைபெற்றுக் கொண்டிருந்தது.

அப்போது டில்லி உயர் நீதிமன்றம் பிறப்பித்த அறிக்கையை நீதிபதி ஓ. பி. சைனி படித்தார். அதில் குற்றவியல் நடைமுறைச் சட்டம் அளித்த அதிகாரத்தின்படி டில்லி உயர் நீதிமன்றம் தற்காலிக தலைமை நீதிபதியும் இதர நீதிபதிகளும் 2 ஜி ஸ்பெக்ட்ரம் வழக்கு விசாரணையை திகார் சிறை வளாகத்துக்கு மாற்ற உத்தரவிட்டு இருப்பதாக கூறப்பட்டு இருந்தது.

இதன்படி, இன்றிலிருந்து ஸ்பெக்ட்ரம் வழக்கு விசாரணை திகார் சிறை வளாகத்தில் நடைபெறும் என்று நீதிபதி ஓ. பி. சைனி அறிவித்தார்.

அப்போது நீதிமன்றத்தில் ஆஜராகி இருந்த ஆ. ராசா, கனிமொழி உட்பட குற்றம் சாட்டப்பட்ட அனைவரும் திகார் சிறைக்கு வழக்கு விசாரணையை மாற்றுவதற்கு கடும் எதிர்ப்பு தெரிவித்தனர்.

இந்த நாட்டில் என்ன நடக்கிறது என்றே தெரியவில்லை என்று ஆ. ராசா கூறினார் அவர் மேலும் கூறியதாவது : திகார் சிறைக்கு விசாரணையை மாற்றுவதால் நாங்கள் சட்டத்தரணிகளுடன் உரிய சட்ட அலோசனை நடத்த முடியாது இப்போதுள்ள இடத்துக்கு உச்ச நீதிமன்றம் மற்றும் உயர் நீதிமன்றத்தில் இருந்து 10 அல்லது 15 நிமிடத்தில் சட்டத்தரணிகள் வந்து விடுவார்கள்.

ஆனால் இனிமேல் உச்ச நீதிமன்றத்தில் மற்ற வழக்குகளை விட்டுவிட்டு அவர்கள் திகார் சிறைக்கு வருவது சாத்தியம் அல்ல. இதனால் நிறைய பிரச்சினைகள் ஏற்படும் இவ்வாறு அவர் கூறினார். கனிமொழி கூறுகையில் : நாங்கள் மூத்த வழக்கறிஞர்களை அமர்த்தி உள்ளோம். இந்த ஒரு வழக்குக்காக அவர்கள் இவ்வளவு தூரம் வரவேண்டும். இதனால் அவர்களுக்கு அசெளகரியம் ஏற்படும் என்றார்.

திகார் சிறைக்கு வழக்கு விசாரணையை மாற்றும் அறிக்கையை எதிர்த்து டில்லி உயர்நீதிமன்றத்தில் மேன்முறையீடு செய்யப்போவதாகவும் சட்டத்தரணிகள் தெரிவித்தனர்.