மீண்டும் சொதப்பிய டெண்டுல்கர்

by **நேசமுடன் ஹாசிம்** Fri 25 Nov 2011 - 9:09

"கிரிக்கெட்டின் கடவுளாக" அனைவராலும் போற்றப்படும் மாஸ்டர் பேட்ஸ்மேன் சச்சின் டெண்டுல்கர் கிரிக்கெட் வரலாற்றில் 100வது சதமடித்து சதத்தில் சாதனை படைப்பார் என்று எதிர்பார்க்கப்பட்ட நிலையில், 94 ரன்களில் ஆட்டமிழந்து அவர் ரசிகர்களுக்கு ‌பேரதிர்ச்சியை ஏற்படுத்தினார்

1989ம் ஆண்டு நவம்பர் மாதம் 15ம் தேதி, பாகிஸ்தானிற்கு எதிராக களமிறங்கிய சச்சின் டெண்டுல்கர், இதுவரை 182 டெஸ்ட் போட்டிகளிலும், 453 ஒருநாள் போட்டிகளிலும், 285 முதல்தர போட்டிகளிலும் பங்கேற்று விளையாடியுள்ளார். 182 டெஸ்ட் போட்டிகளில் விளையாடியுள்ள சச்சின், 51 சதங்களும், 63 அரைசதங்களும் அடித்துள்ளார். அதேபோல், ஒருநாள் போட்டிகளில் 48 சதங்களும், 95 அரைசதங்களையும் கடந்துள்ளார்.

டெஸ்ட் போட்டிகளில், சச்சின் 63 அரை சதங்களை கடந்ததன் மூலம், அதிக அரைசதமடித்த வீரர்கள் பட்டியலில், ஆஸ்திரேலிய வீரர் ஆலன் பார்டருடன் (63) முதல் இடத்தை பகிர்ந்து கொண்டுள்ளார்.

கிரிக்கெட் வரலாற்றில், இதுவரை 99 சதங்களை கடந்துள்ள சச்சின் டெண்டுல்கர், 1 சதம் அடித்து, சதத்தில் சதம் அடிப்பார் என்று ரசிகர்கள் எதிர்பார்த்துவந்தனர். ஆனால், அவர்களுக்கு இங்கிலாந்து தொடர் மற்றும் தற்போது இந்தியாவில் நடைபெற்று வரும் வெஸ்ட் இண்டீசிற்கு எதிரான டெஸ்ட் தொடரின் முதல் 2 போட்டிகளில் ஏமாற்ற‌மே மிஞ்சியது. இந்நிலையில், 3வது போட்டி மும்பையில் நடைபெற்று வருகிறது. முதலில் பேட்டிங் செய்த வெஸ்ட் இண்டீஸ் அணி 2 நாட்கள் தொடர்ந்து விளையாடி 590 ரன்களுக்கு ஆட்டமிழந்தது. போட்டியின் 3வது நாளில், தனது முதல் இன்னிங்சை துவக்கிய இந்திய அணி துவக்க வீரர்கள் சிறப்பானதொரு துவக்கத்தை ஏற்படுத்தித் தந்தனர். சேவக் 37 ரன்களிலும், காம்பீர் 55 ரன்களிலும், டிராவிட் 82 ரன்களிலும் லட்சுமண் 32 ரன்களிலும் ஆட்டமிழந்தனர்.

முடிவே முக்கியம்...சாதனை அல்ல : காம்பீர் - சாதனை நிகழ்த்துவது என்பது அவரவர் தனிப்பட்ட விசயம். நான், இப்போட்டியில் முடிவையே பெரிதும் எதிர்பார்த்துள்ளதாகவும், சச்சின் சாதனையை பொருட்டாக நினைக்கவில்லை என்று அணி வீரர் கவுதம் காம்பீர் கருத்து தெரிவித்துள்ளார்.

ஆவலுடன் உள்ளேன் - கும்மின்ஸ் : ஆஸ்திரேலிய சுற்றுப்பயணம் செய்ய உள்ள இந்திய அணியில் இடம்பெற்றுள்ள மாஸ்டர் பேட்ஸ்மேன் சச்சின் டெண்டுல்கருடன் விளையாட தான் ஆவலாக உள்ளதாக ஆஸி., அணியின் இளம் வீரர் பேட் கும்மின்ஸ் கூறியுள்ளார். 18 வயதான கும்மின்ஸ், அறிமுகமான முதல் போட்டியிலேயே 7 விக்கெட்களை வீழ்த்தி, தென் ஆப்ரிக்காவிற்கு எதிரான டெஸ்‌ட் தொடரை வென்றதற்கு காரணமாக இருந்தவர் என்பது குறிப்பிடத்தக்கது.